La Xunta pola Defensa de la Llingua Asturiana critica al Conceyu d'Uviéu pola ausencia del asturianu nes fiestes de San Mateo
La Xunta pola Defensa de la Llingua Asturiana (XDLA) púnxose en contactu tanto cola conceyala de Servicios Sociales, Festexos y SOF, Belén Fernández Acevedo, como col director de la SOF, Javier Batalla, pa face-yos llegar la so esmolición porque nes fiestes de la capital d'Asturies recién acabaes nun actuara nengún grupu de los que tienen l'asturianu como vehículu d'espresión nes sos lletres, mentes que n'ediciones anteriores de San Mateo actuaren otros y con gran éxitu de públicu.
La XDLA reclama que nes fiestes de San Mateo se cuente colos grupos musicales qu'usen la llingua asturiana nes sos canciones. Paeznos que nun hai que dexar de llau, y menos nesti tiempu de crisis, a los grupos qu'apuesten por crear nuna llingua minorizada como la nuestra porque ellos tiénenlo tovía más difícil y les instituciones públiques tán obligaes a velar pol patrimoniu llingüísticu del que son vehículu.
Queremos tamién facer notar que la presencia del nuestru idioma, en xeneral, en San Mateo 2012 foi bien probetaya: namás la representación de la obra "Les Llinguateres" nel Teatru Filarmónica, y más nada. Nin s'usó en cartelería, nin nos programes, nin na publicidá.