La XDLA caltién contactos coles candidatures al rectoráu de la Universidá d'Uviéu

A lo llargo de les últimes selmanes, la XDLA reunióse colos candidatos al rectoráu de la Universidá d’Uviéu, que van disputar esi cargu nunes elecciones en feches próximes tovía ensin determinar por cuenta de la situación xenerada pol andanciu.

Nesos conceyos colos candidatos tratáronse cuestiones rellacionaes cola normalización del asturianu dientro de la institución académica y tamién s'analizaron les situaciones del vulneración de derechos llingüísticos que sigue careciendo davezu l’alumnáu.

De la mesma manera, apurrímos-yos a los candidatos un decálogu de compromisos normalizadores cola mira de que lu incluyan nos sos programes electorales y se comprometan a llevalu alantre a lo llargo del so mandatu.

Dende agora y hasta la fecha na que se faigan de manera efectiva les elecciones, la XDLA va siguir en contactu colos candidatos col oxetivu de que los compromisos algamaos en materia llingüística sían efectivos, reales y eficaces pa treslladar a la Universidá la necesidá de qu’asuma la so responsabilidá n'asegurar los derechos llingüísticos y ser amás un focu fundamental de normalización.