La XDLA llama a tola sociedá a demostrar l'apoyu masivu a la oficialidá participando na última manifestación pola oficialidá

La Xunta pola Defensa de la Llingua Asturiana (XDLA) fai un llamáu a tolos asturianos y asturianes pa que, como vienen faciendo dende hai 40 años, muestren l'apoyu a la igualdá de derechos llingüísticos ente tola ciudadanía y a un futuru dignu pal nuestru patrimoniu llingüísticu.
 
Esti sábadu 16 d'ochobre, a les 12.00 hores, va salir de la Estación del Norte d'Uviéu una manifestación pola oficialidá que ta llamada a ser masiva y que va acabar na Plaza de la Catedral. Ellí, l'actriz María Cotiello y el presentador del tiempu de TPA David Arango van encargase de lleer el manifiestu final, mentes que'l DJ Fruela 757 y el cantante Rodrigo Cuevas van encargase de poner el ramu a la xornada reivindicativa con un miniconciertu.
 
Pel momentu, la manifestación yá cuenta col apoyu de tolos sindicatos mayoritarios, amás d'una parte importante de los partíos políticos y del texíu asociativo asturiano. Amás, xente conocío de la sociedá asturiana –como Silvia Quesada, Lisardo Lombardía, Sonia Fidalgo o los grupos Llan de Cubel o Felpeyu, ente otros- ta mostrando'l so apoyu y animando a la participación na convocatoria al traviés d'una campaña en redes sociales. Amás, los personaxes del programa infantil 'Animalada Xabaz' de TPA tamién protagonizaron un videu p'animar a la participación na marcha del 16 d'ochobre.
 
Otra manera, la escena sonora asturiana ayudó a promocionar la convocatoria al traviés del cantar 'Llegó la hora/Chegóu el hora', qu'axuntó a más d'una ventena d'artistes pa la so ellaboración y con un videoclip obra del realizador Pablo Quiroga qu'en menos de 48 hores yá tien miles de visites.
 
La XDLA quier recordar que la oficialidá namás ye'l reconocimientu llegal del derechu que tien cualquier persona a usar llibremente la llingua propia d'un territoriu. La oficialidá ye un avance democráticu porque amplía derechos y llibertaes ciudadanes. N'Asturies tenemos dos llingües propies, l'asturianu y el gallego-asturianu, y los sos falantes nun tienen reconocíu llegalmente esi derechu. Si les nuestres llingües son como les demás llingües del Estáu, ¿por qué los sos falantes tienen menos derechos que los falantes d'otres comunidaes? Queremos el mesmu tratu institucional y el mesmu réxime de protección que tienen les demás llingües del Estáu.
 
Nun ye ético tener más tiempu esta situación indigna pal nuestru patrimoniu cultural: si somos conscientes de la situación de desigualdá nun se pue esperar más. Hai que reformar l'Estatutu d'Autonomía p'aprobar la oficialidá y depués, con una Llei de Normalización, siguir un procesu adaptáu a la situación asturiana. Na llexislatura próxima, na Xunta Xeneral hai que poner remediu a un déficit democráticu que lleva demasiaes décades pendiente.
Documentos: