La XDLA reclama recoyer nos presupuestos polítiques clares a favor del asturianu y del gallego-asturianu

 

La organización, pola mor del debate sobre los cuentes na Xunta Xeneral, quier recordar que'l sector de la industria de la llingua axunta a profesoráu, investigadores, escritores, programadores, actores, periodistes, músicos, llingüistes, traductores y profesionales técnicos de dellos ámbitos, ente otros.

 

Por eso, más allá de les partíes contemplaes pa la política llingüística y les enmiendes posibles que presenten los grupos parllamentarios, la XDLA quier recordar que l'asturianu sigue ensin ser llingua vehícular nes escueles y que, nesi sentíu, nesta llexislatura la presencia del idioma dio pasos atrás cola fin del Plan Pilotu d'Asturianu que se punxera en marcha col Executivu de Javier Fernández.

 

Otra manera, TPA sigue ensin emitir dibuxos animaos n'asturianu y nun hai informativos nin retresmisiones deportives nel nuestru idioma, mentes que nestos momentos RPA nun tien conteníos específicos sobre música asturiana. Ye más, los minutos radiaos nesti idioma puen contase lliteralmente colos deos d'una mano. 

 

Esta situación y el casu de Xicu Ilesies -al que la xusticia nun permitió rexistrar el nome y los apellíos na so llingua materna- muestra que'l derechu a usar l'asturianu nun ta reconocíu nesta comunidá autónoma. La XDLA quier recordar la responsabilidá que tienen les alministraciones públiques, pero tamién los grupos parllamentarios, en toes estes cuestiones, polo que ye urxente que dende los medios de comunicación públicos y dende'l sistema educativu se tomen midíes proactives a favor del usu de les nuestres llingües propies.

 

Y too esto tien que facese independientemente del llugar de residencia, situación socioeconómica, orixe o entornu sociollingüísticu. Quier dicise, l'asturianu y el gallego-asturianu tienen que ser non solo un patrimoniu cultural sinón tamién un símbolu de cohesión social ente asturianes y asturianos. Pa eso, el curriculu educativu tien qu'incluyir l'asturianu y el gallego-asturianu, amás de la cultura asturiana, como exes vertebradores.

 

Nesi sentíu, a pesar de les palabres guapes hacia'l patrimoniu llingüísticu que vienen dende los dirixentes de la FSA-PSOE, los presupuestos nun contemplen partíes pa fortalecer la Dirección Xeneral de Política Llingüística con más filólogos y traductores pa encarar les iniciatives normalizadores na Alministración pública, tanto nel so personal como nes sos campañes, publicaciones y  webs. La Dirección Xeneral de Política Llingüística nun pue convertise nuna axencia de subcontratación al meyor postor onde se premien los proyectos más baratos perriba de la so calidá o repercusión.

 

Como tolos años, la XDLA vuelve insistir en que destinar 100.000 de Política Llingüística -que yá supón namás el 0,4 % de toles cuentes- vaiga pa RTPA, que tien 27 millones d'euros de la Conseyería de Presidencia, ye dir contra l'Estatutu, la Llei d'Usu y la mesma llei de creación de RTPA, normes qu'establecen que los medios públicos tienen que ser una parte activa nel procesu de recuperación del patrimoniu llingüísticu del país. 

 

Por eso, la XDLA reclama a la Conseyería de Cultura qu'esa partida se destine a firmar un conveniu de collaboración con RTPA pa la creación d'un Serviciu Asturianu de Doblaxe y Traducción, destináu sobre manera a nutrir de dibuxos animaos a la canal pública y qu'estos productos valgan como apoyu a la enseñanza d'esti idioma.