Cursu avanzáu de Llingua Asturiana n'Uviéu
posted by xdla
on Tue, 04/04/2023 - 14:11
La Xunta pola Defensa de la Llingua Asturiana entama un cursu d’afondamientu llingüísticu pa persones adultes de 20 hores de duración, onde los alumnos y alumnes van poder perfeccionase nel bon usu del idioma tanto a nivel escritu como oral, amás de nes rellaciones ente llingua y sociedá.
El cursu empieza’l martes 11 d'abril, nel local de l'asociación, na cai Cimavilla 15, escalera A, 1.u C. L'horariu va ser de 19.00 a 21.00 hores, los martes y xueves.
El preciu de la matrícula completa ye de 30 euros y pa inscribise nun fai falta tener nenguna titulación o profesión concreta. Sicasí, aconséyase a les persones que se vaigan matricular que tengan una conocencia básica de la espresión escrita y oral del idioma.
Toles persones interesaes puen apuntase mandando un mail a la dirección info@exunta.org.
Les places son llimitaes y va tener preferencia l'alumnáu matriculao nel cursu básicu.
Hai que recordar que la Conseyería d’Educación y Universidaes reconoz a la Xunta pola Defensa de la Llingua Asturiana como entidá organizadora d’actividaes de formación permanente del profesoráu poro, esti cursu proporciona creitos homologaos de formación al profesoráu de Primaria y Secundaria a quién lu realice con aprovechamientu.