DISCURSU MANIFESTACIÓN LLETRES ASTURIANES
Gracies por venir otru añu más a esta convocatoria de la Xunta pola Defensa de la Llingua Asturiana. Otra vuelta coincidiendo con una precampaña electoral y otra vuelta depués d’una llexislatura escosada ensin avances nel terrén de los derechos llingüísticos. Ye verdá que paez que somos víctimes d’un cuentu de la bona pipa ensin salida, pero asegúrovos que paga la pena: nun lo debemos tar faciendo tan mal cuando’l movimientu de recuperación llingüística foi quien a que nestos años l’asuntu de la oficialidá del asturianu y del gallego-asturianu se convirtiera nun tema central nes campañes electorales últimes y nos programes de dalgunos partíos.
Nun tenemos que nos desanimar, y eso que nesta campaña que nos espera vamos ver de too. Vamos ver a los partíos más radicales y antidemocráticos que suañen con tener mayoría abonda pa desaniciar la llingua, o polo menos ganar tiempu pa dexala morrer adulces cola muerte de los últimos falantes. Esos qu’utilicen l’insultu y l’amenaza contra les que nun pensamos igual, que nun ameritaríen nin que-yos dediquemos nin un minutu más del nuestru discursu, namás si acaso pa dici-yos que nun nos vamos achicar, que nun nos damos, que la xente que defendemos estes llingües nun nos rindimos, que nun s’acaba fácil con una llingua que tien defensores como vós, de foz y forcáu, que tais equí y que vais siguir viniendo añu tres añu a llenar estes cais por un derechu humanu, pol derechu a vivir n’asturianu… Pa ellos namás estes 10 lletres, estes 5 sílabes que nun vamos dexar de pronunciar:
¡O – FI – CIA – LI – DÁ!
Tamién van tar nesta campaña electoral los que siguen aneciando col so eslógan falseru d’asturianu sí, oficialidá non, como si nun-yos lu desmontáremos milenta veces yá amosando l’autoodiu que s’escuende detrás, el complexu que tienen énte otres llingües del Estáu, a les que sí consideren dignes de tener reconocimientu oficial, y la discriminación que quieren siguir calteniendo pa les comunidaes de falantes d’asturianu y de gallego-asturianu, anque ellos cínicamente los usen dacuando o n’ambientes onde al paecer pue da-yos rindimientu políticu. Eso si tovía engañen a dalguién...
Y tamién van tar los que se pronuncien ambiguamente a favor del asturianu, o qu’escuenden la palabra oficialidá con eufemismos, esperando nun tener un papel protagonista nel procesu que necesariamente se va abrir, o que lo dicen cola boca pequeña pa nun tener que se pronunciar los primeros o esperando’l momentu de poder usar los votos que vaigan tener pa intentar un cambéu de cromos con dalguna otra reivindicación que sí defenden o abanderen a les clares.
Y tamién van tar, claro, los que dicen tener un compromisu col respetu a les llingües y lleven nos sos programes propuestes de reforma del estatutu d’autonomía pa recoyer con diferentes fórmules y, ente otres coses, la oficialidá del asturianu y del gallego-asturianu. Y esto tenemos que velo, tien que velo’l movimientu de reivindicación llingüística, como un trunfu de tantos años de movilización, d’estudiu, de dignificación, de reivindicación y d’usu de les llingües… na música, nel teatru, na lliteratura, nos centros de trabayu y d’estudiu; en definitiva, na vida social. Ye un trunfu de toes y toos vós, y de muncha xente que tuvo y yá nun ta. Tien que facenos sentir que tamos cerca de que se llogre la oficialidá de les nuestres llingües. Empieza a ser realista dicir que yá ta ehí, que yá, que
¡Yá, yá, yá! ¡Oficialidá!
Sía’l que sía’l resultáu de les elecciones del 28 de mayu, el mandáu va ser imperativu pa la Xunta Xeneral que se forme: hai qu’acabar yá cola discriminación llingüística, con esta situación d’anomalía democrática y constitucional que carecemos n’Asturies.
La única solución ye aprobar una redacción nueva del estatutu d’autonomía, siguiendo’l modelu de les seis comunidaes autónomes que yá reconocen la oficialidá de les llingües que se falen nos sos territorios. Ensin más aplazamientos, ensin condiciones y ensin recortes.
Y eso hai que facelo sumando l’alcuerdu de la mayoría suficiente de diputaes y diputaos que’l propiu estatutu afita pa la so reforma. Nun val echar cuentes de votos ensin trabayar primero na construcción d’esi alcuerdu. Nun val escusase na sida d’un resultáu partidista pa nun ponese a trabayar dende’l primer periodu de sesiones de la llexislatura, dende l’otru día de constituise la cámara, na busca d’esa mayoría. Una mayoría que se tien que construir como pa toles lleis que s’aprobaron na Xunta Xeneral dende que nun hai mayoríes absolutes de nengún partíu. ¿Quién s’alcuerda yá?
Nun trabayar nesi sen va dar el mesmu resultáu que dio na llexislatura qu’acaba: que 18 diputaos y diputaes en contra d’un avance nel reconocimientu de los derechos llingüísticos foron quien a imponer a los demás, a la mayoría, y a tola población asturiano, la so idea d’una Asturies menos llibre, menos plural, menos tolerante y más atrasada. Que nun se repita esi fracasu.
Trés xeneraciones de votantes esperen por ello: la que caltuvo viva la llingua nos peores momentos históricos, la qu’entamó a lluchar polos derechos llingüísticos dende la transición y la que ta garrando agora’l testigu y va siguir lluchando col enfotu de por fin poder facer vida n’Asturies n’asturianu o en gallego-asturianu. Les trés merecen un reconocimientu y una reparación histórica. Que nun se frustren les sos espectatives. Que nun sía tarde de más pa salvar les nuestres llingües. Ye’l momentu de pasar a la historia construyendo una Asturies meyor, una Asturies arguyosa de lo de so, una Asturies onde toles asturianes y tolos asturianos tengan los mesmos derechos falen la llingua que falen. Por eso, pídovos que glayéis conmigo:
¡L’asturianu, llingua oficial!
¡Puxa Asturies!
