RTPA sigue marxinando l'asturianu y el gallego-asturianu nes sos canales dixitales
posted by xdla
on Thu, 09/28/2023 - 15:40
RTPA cambió la so web y les sos redes sociales. Sicasí, esa renovación nun supón una visibilidá mayor de les llingües que por llei RTPA ta obligada a protexer. L'asturianu sigue arrequexáu a una sección de noticies, con testos traducíos al asturianu pero que conserva la llocución en castellanu, y a una estaya-contenedor con dalgunos de los pocos programes n'asturianu emitíos a lo llargo de cuasi 20 años d'emisión. Per otru llau, l'usu de la toponimia ye marxinal y el gallego-asturianu ye una llingua que nun existe.
La situación dexa a les clares la visión de la cultura y la llingua asturiana acomplexada que tienen dende RTPA y la necesidá d'un cambiu na dirección. Nestos momentos, nun hai programación infantil nel nuestru idioma, la toponimia oficial ta marxinada, namás s'emiten programes d'entretenimientu n'asturianu si paga la Conseyería de Cultura y esta llingua ta vetada nos programes deportivos y nos doblaxes de llargumetraxes y series, mentes qu'en RPA nun hai espacios dedicaos a la música nes nuestres llingües.
L'Estatutu y la mesma Llei d'Usu, amás de la llei de creación de RTPA dicen que los medios de comunicación públicos tienen que tener una presencia “amañosa” de les llingües propies y tienen que ser una ferramienta p'ayudar a normalizar l'asturianu y el gallego-asturianu. Por eso, la XDLA reclama a los partíos con representación parllamentariu qu'empiecen el procesu pa cambiar la dirección de RTPA, porque l'actual mostró n'ocasiones reiteraes la so posición contraria a la normalización llingüística y al cumplimientu de la llexislación vixente.
A pesar de les palabres bones del Gobiernu actual hacia'l nuestru patrimoniu llingüísticu l'asturianu y el gallego-asturianu siguen marxinaos na programación y na so presencia pública en RTPA. Pa iguar esta situación nun fai falta esperar a la oficialidá, namás fai falta voluntá política. Pel momentu, depués de dos llexislatures d'Adrián Barbón la voluntá amosada sigue siendo la mesma que na llexislatura de Javier Fernández: la marxinación del asturianu.