La XDLA na comparecencia de los Presupuestos del 2024 na Xunta Xeneral
posted by xdla
on Tue, 12/12/2023 - 10:50
Bones tardes. Quería, primero de nada, dar les gracies a Podemos por pidir a la Xunta pola Defensa de la Llingua Asturiana que participáremos col nuestru puntu de vista nesta comparecencia sobre los presupuestos p’Asturies.
L’añu que vien, la organización a la que represento fai 40 años. Eses cuatro décades de trabayu y reivindicación dannos perspectiva abondo pa ver cuánto reculó l’asturianu en númberu de falantes, en rangos d’edá; sobre manera, cómo se corta la cadena de tresmisión ente xeneraciones y qué pocos neños y neñes lo hereden como llingua d’usu normal.
Ye verdá que tamién nestos 40 años conocimos dellos avances sociales, sobre manera gracies al trabayu y la presión del movimientu de reivindicación llingüística, y gracies a la so presencia y pesu nes instituciones, dacuando cola incomodidá o la indiferencia de los Gobiernos socesivos. Por mentar dalgunes coses: la escolarización de l’asignatura, la codificación llingüística (normes, diccionariu, gramática, traductor...) o la oficialización de la toponimia tradicional.
Nestos 40 años d’existencia de la Xunta pola Defensa de la Llingua Asturiana, les persones que defendíemos los nuestros derechos tuvimos que soportar prexuicios, inorancia, desprecios y ataques de toa mena dende les páxines de los periódicos y medios de comunicación en xeneral. Non solo de particulares, sinón de los responsables políticos de los socesivos gobiernos autonómicos dende aquella p’acá: que si llingua inventada, que si nun la fala nadie, que si nun hai demanda social, que sí a los milentas bables pero non a eso de llaboratoriu, que mentes haya fame nel mundu pa qué vamos tirar perres nesto, que si s’empieza colos apóstrofos acabamos poniendo bombes... En fin, tol repertoriu d’opiniones de chigre que, anque paeza mentira colo qu’avanzó’l mundu, tovía siguen repitiendo munchos.
Llevamos sintiéndolo toos estos años tanto a xente d’esquierda como de derecha. Na actualidá, esi negacionismu de la realidá llingüística asturiana namás queda nes cúpules de los partíos de la derecha y la estrema derecha, que siguen acérrimes como últimos representantes de la intolerancia y el rechazu a la recuperación del patrimoniu llingüísticu asturianu.
Na llexislatura pasada asistimos a un debate político-mediáticu, que non parllamentariu, con básicamente trés tipos de declaraciones: a) declaraciones de partíos a favor de la oficialidá, b) declaraciones de partíos qu’hipotecaben esa oficialidá condicionando’l so desenvolvimientu a mayoríes parllamentaries que la diben convertir en papel moyao, y c) declaraciones negacionistes como les que menté va poco.
Eso sí, too declaraciones, non propuestes debatíes na Xunta Xeneral, non votaciones nesta sede.
Al final, paez qu’una cuestión tan estrallingüística como la de les rebaxes fiscales acabó coles negociaciones y anguaño atopámonos con que se perdió aquella oportunidá histórica.
Sabemos qu’esti ye un debate presupuestariu, pero paecíanos necesario facer la introducción qu’acabamos de facer porque, siendo sabedores del retrocesu evidente del usu del asturianu y de que perdemos oportunidaes añu tres d’añu pa tornar esi procesu, cualquier presupuestu que nun ponga les bases pa eso va ser un entretenimientu, un placebu. Les midíes que se tomaron hasta agora acompañaron esi procesu de desapaición, nun lu tornaron. Ta claro que la oficialidá diba facilitar adoptar midíes polítiques y presupuestaries enérxiques y potentes, pero la falta d’esi marcu llegal nun quita pa que les haya... si hai voluntá política de les fuercies que formen el Gobiernu. Eses midíes normalizadores precisen presupuestu abondo, por eso proponemos aumentalu y dedicar un 1 % del presupuestu global a les llingües d’Asturies, al asturianu y al gallego-asturianu. Claro que, pa eso, hai que tomar en serio la situación crítica qu’espunximos a lo primero. Si nos paez que les coses pueden siguir asina, morriendo al ralentín en tiempu real, ye abondo colo qu’hai.
Nun ye la nuestra función diseñar los presupuestos y tampoco nun vamos pidir que se ponga un cero más a toles cantidaes presupuestaes. Nun se trata de tirar les perres, sinón d’aprovechales pa buscar toles potencialidaes que tien la inversión nesti ámbitu. Tamos falando de técnicos, profesoráu, investigadores, escritores, guionistes, programadores, actores, periodistes, músicos, llingüistes, traductores, diseñadores, ente otros.
Pero dende la propia Alministración pue facese muncho. El personal especializao que tien la Dirección Xeneral d’Acción Cultural y Normalización Llingüística dedicao a esos llabores ye mui escaso en comparanza con otres comunidaes. Ensin un control de la calidá de lo que se fai, o de lo que se subvenciona, o de lo que se subcontrata, atopámonos con una televisión pública que nun tien un serviciu de normalización y que dexa al debalu l’asturianu qu’apaez na so programación. Y sigue destinándose una partida de 100.000 euros de la Dirección Xeneral pa RTPA, que yá tien los sos millones d’euros de presupuestu propiu, cuando usar l’asturianu tenía que ser la so obligación como parte activa nel procesu de recuperación del patrimoniu llingüísticu del país. ¿Por qué nun se crea un serviciu de doblaxe o se fomenta la creación propia de programación infantil cuando sabemos que son aspectos fundamentales y estratéxicos pa la supervivencia del idioma?
Estos exemplos dan una idea de que non solo se trata d’aumentar el presupuestu, sinón tamién d’aplicar una política presupuestaria decidida que fortaleza les estructures técniques de l’Alministración y qu’optimice los beneficios normalizadores de cada euru invertíu.