La selmana pasada la pancarta de “Conceyos pola Oficialidá”, la iniciativa de la Xunta pola Defensa de la Llingua Asturiana que, xunto al conceyu de Bimenes, busca visibilizar el compromisu del más d’un cientu de cargos municipales cola reivindicación de la oficialidá del asturianu y del gallego-asturianu, tuvo puesta nel corredor de la Casa Conceyu de Bimenes, en Martimporra.

Güei, como anunciáramos, va arrancar pa un recorríu pela xeografía asturiana, demostrando qu’esta llucha tien apoyos per tol país. La primer parada va ser n’El Parche d’Avilés, delantre de la Casa Conceyu: militantes de la Xunta pola Defensa de la Llingua Asturiana van llevar la pancarta y amosala ellí, a les 18h, cola compañía de los y les conceyales d’Avilés que firmaron la Carta de Bimenes.

L’alcaldesa d’Avilés obligó’l mesmu Día de les Lletres Asturianes a retirar una pancarta a favor de la oficialidá cola sida de que se trataba d’un mensaxe partidista, demostrando asina’l so calter autoritariu y poco sensible cola cultura asturiana, a la qu’había respetar por mor del so cargu.

Que la oficialidá nun ye un oxetivu partidista nin localista nin elitista demuéstralo’l fechu de que la iniciativa “Conceyos pola Oficialidá” cuenta yá con más d’un cientu de conceyales de cuasi la metá de los conceyos d’Asturies, que fueron escoyíos nes pasaes elecciones municipales dientro de candidatures qu’algamaron en xunto más de 130.000 votos d’electores d’Asturies, y ente los que s’alcuentren persones de cuasi toles formaciones polítiques, incluída la de la propia alcaldesa d’Avilés.

Paralelamente a esti actu n’El Parche, conceyales firmantes de “Conceyos pola Oficialidá” van solicita-y permisu formal al gobiernu municipal pa colocar la pancarta nel corredor de la Casa Conceyu d’Avilés en feches venideres. Vamos pidi-y a Mariví #quelaponganelbalcón.

Discursu Mani 2016
Gracies por axuntavos, como siempre, a esti llamáu a l'acción y la reivindicación. A esta cita que llevamos apuntada permanentemente nos calandarios, nes camisetes y hasta en mesmu corazón. Faiga sol o xarace les más de les veces, nublao o escamplao, xuntos percorremos, con más o menos rodeos, el camín que va bien de tiempu la nuestra comunidá llingüística decidió andar. El camín d'un futuru; un futuru ensin marxinación y discriminación, un futuru con derechos y dignidá.

Esti camín pasa tolos años pela antoxana d'esti teatru y tócanos facer, más que recapitulaciones, compromisos de llucha y llabor pal tiempu nel que tamos y pal que va venir.

A pesar de llevar arrecostinando más de trenta años cola sentencia de desapaición, cola aburrición y el silenciu que los nuestros gobernantes traten d'imponenos cola so desidia, les sos omisiones y los sos ataques. A pesar d'eso, nunca vamos danos y vamos facer que'l so poder vieyu, ranciu y corruptu dexe de tarazanos los derechos y el futuru.
Yá ta bien d'aguantar “instituciones” qu'intenten impidir qu'un Conceyu apruebe una simple declaración o un plan de normalización pa protexer la so realidá llingüística. Yá ta bien de ver cómo n'Avilés, la tercer ciudá del país, tamién hai quien vota en contra de que se regule l'usu del idioma, una midida que nun ye namás que protexer a la xente que quier usar l'asturianu nes sos rellaciones cola Alministración.

Vemos que'l problema y lo que molesta, pa dalgunos, ye namás que se fale n'asturianu, que se fale del asturianu, que s'aliende. Hai partíos políticos -hai xerifaltes neses formaciones- que nun quieren, yá non la oficialidá, sinón qu'haya conceyos que reconozan que n'Asturies hai una llingua propia qu'hai que protexer, afalagar y usar. Y esto nun se pue permitir. ¿Cómo nun van los conceyos reconocer la llingua que fala una parte importante de los vecinos y vecines?

Por eso esti añu participó con nós una comitiva col lema “Conceyos pola Oficialidá”, una acción pa frañar esi techu y mostrar que son munchos los Conceyos y munchos los y les representantes democráticos de la xente que quieren dar un pasu alantre pa favorecer la transición a una dómina nueva onde los derechos fundamentales de les persones que falen asturianu o gallego-asturianu tean aseguraos, onde al traviés de la Oficialidá se reconoza la igualdá xurídica de tola ciudadanía.

Va venti años yá, esti camín de reconocimientu entamó en conceyu Bimenes. D'entós p'acá, el nome d'esti conceyu y la so xente resuena per toa Asturies porque ye un símbolu pa la llingua asturiana y pa los sos falantes, porque foi pioneru en reconocer, anque fora de manera simbólica, los derechos de les persones que falen asturianu -y eso nun ye otro que reconocer los derechos de la mayoría de los sos vecinos-.
Agora Bimenes vuelve ser un conceyu pioneru, un exemplu pa siguir polos demás conceyos asturianos; va ser el primeru en garrar una pancarta onte tean representaos conceyales de tolos partíos que quieran, una pancarta que demuestre qu'en tolos partíos, perriba de les sos diferencies ideolóxiques, hai xente que se compromete a trabayar pola llingua del país y el so futuru basándose en principios que teníen que ser tan básicos como'l respetu y la tolerancia.

Nunos pocos díes fuimos a llegar a cientos de manes que garraron tamién esta pancarta, cientos de manes de les persones que tienen el compromisu de representar a la xente de los sos conceyos. Conceyos grandes, medianos y pequenos, del cordal y de la mariña, del oriente y l'occidente, del Palu p'alló y p'acó.

El testigu de Bimenes yá lu garraron dende Uviéu, Xixón y Avilés; dende Llangréu, Llaviana, Ayer, L.lena y Mieres; dende El Valle Altu de Peñamellera, Morcín, Ribeseya, Nava, Siero, Villaviciosa, Carreño, Castrillón, Corvera, Noreña y Llanera; Dende Pravia, Sotu'l Barcu, Grau y Cangas... Y tampouco nun deixaron de coyelo dende os conceyos del Franco, A Veiga, Eilao, Santalla, Cuaña y Grandas.

Vamos siguir nes próximes selmanes texendo esta rede de voluntaes, intentando llegar a los sitios onde tovía nun fuimos quién y sumar más xente a estos más de 30 conceyos y esti centenar de cargos públicos que representen yá más de 130.000 votos de la xente d'Asturies.

Y non solo nestes selmanes, sinón tol añu vamos siguir con esti llabor y con tolo que faiga falta pa defender l'idioma y el so futuru. Un futuru que ta encontáu necesariamente na educación y nos medios de comunicación. Nun vamos escaecer y dexar de reivindicar nunca que pa que s'empiece a tener un sistema educativu dignu necesítase la Especialidá en primaria y secundaria, y nun nos valen les promeses nin el cambéu de fiches de que si'l ministeriu, que si la conseyería... Queremosla yá porque hubo tiempu se sobra nestos años. Yá cansa un poco dicilo, pero paez que nun-yos da muncho más: si l'asturianu fora oficial la especialidá diba ser automática.

Tampoco nun vamos escaecer la promesa de la puesta en marcha de los centros pilotu d'usu vehicular del idioma pa esti cursu 2016-2017. O de la regularización de la presencia n'Infantil. De xuru que, anque la Conseyería d'Educación y Cultura ande azacanada estos díes, van atopar tiempu pa facelo, pero que s'alcuerden que setiembre ta ehí y que lleven repitiendo cursu más de trenta años y tienen que facer muncha recuperación...

Al respective de los medios de comunicación, toos y toes sabéis lo qu'hai... Básicamente, nada. El puntu más llaceriosu y incumplíu del alcuerdu d'investidura ta na TPA. Nesti añu nun hubo nengún avance sinón que foi más bien un retrocesu en too. Cada vez vemos una programación más probe y marxinal y una falta de proyectu que condena la viabilidá del Ente. Agora va negociase un Mandatu Marcu y unos puestos de dirección que, como nun sían a dar la vuelta a la situación, van preparar el camín definitivu pal divorciu ente la televisión pública y la sociedá a la que tenía que sirvir y representar. Tán a tiempu de cambiar, pero tienen que cambialo too, y poner a los medios públicos pa lo único pa lo que tienen sentíu n'Asturies: pa la normalización del asturianu y del gallego-asturianu.

Más nada. Mañana ye un día más de llucha. Vémosnos nes cais, defendiéndonos de cualquier enemigu del idioma y de cualquier represor de les posibilidaes de supervivencia del asturianu, llámese Cherines, Gabino, La Nueva España o FSA.
Puxa Asturies, Puxa l'asturianu.
¡Tola xente xunto con nós na llucha pola Oficialidá!
¡L'asturianu, llingua oficial!

Esti sábadu 23 d'abril, organizáu pola Xunta pola Defensa de la Llingua Asturiana, va facese otru añu más el Conciertu pola Oficialidá, ún de los principales festivales musicales d'Asturies.

Nesta ocasión ta preparáu un cartelu colos grupos:

-Pop Piquiñín
-Tuenda
-Vrienden
-Skontra
-Dixebra
-Nacho Vegas y el Coru Al Altu la Lleva.

Una novedá d’esti añu ye’l sitiu: ye la primer vez que se fai’l conciertu onde la Plaza de la Catedral d'Uviéu.

La hora pa empezar la música va ser alredor de les 18:30 (apertura de puertes a les 18:00h).

Les entraes van vendese a 8 euros anticipaes y a 10, na puerta. Les anticipaes van tar a la venta n’Uviéu (L'Esperteyu Chigre Folk, Cervecería Malá Strana), Xixón (Café Trisquel Chigre, Sidrería Canteli), Avilés (El Cafetón), Candás (Pub Creisi), La Pola (L.lena) (La Palmera), La Pola Siero (Abre César), Mieres (L'Abellugu), Grau (Llibrería Las Dos Vías), Arenas (Cabrales) (Sidrería Los Pegoyos), L'Entregu (La Semiente) y Cangas del Narcea (Bar Azul).

La reivindicación y la folixa xúnense una vez más nel Conciertu pola Oficialidá, que promete hores de bona música al mesmu tiempu que s’esixen los derechos que tien que tener la llingua asturiana n'Asturies.

La Delegación del Gobiernu español n'Asturies, a instancies de los conceyales del PP de Carreño, acaba de pidir a esti Conceyu qu'anule'l Plan de Normalización Llingüística qu'aprobó nel mes de xineru pasáu. Básase pa eso nun informe xurídicu disparatáu que l'actual delegáu en funciones, Gabino de Lorenzo, encargó a una dirección xeneral del Ministeriu de Facienda y Alministraciones Públiques que tien como función la fiscalización y xestión financiera de les propies Delegaciones. Ye un testu deliriante y ridículu no alministrativo y no xurídico, que busca fundamentos onde nun hai. Hai que recordar qu'un Plan de Normalización ye un programa políticu y non una norma xurídica, polo que ye absurdo impugnalu. Los xuristes qu'ellaboraron l'informe paez que desconocen la llei, porque si non nun s'esplica que pueda dicir que los Conceyos nun puen facer política llingüística y qu'eso namás ye cosa del ámbitu autonómicu. Ye más: los Conceyos lleven años faciéndola (y con toles de la llei, porque ye competencia tamién d'ellos, igual que se faen planes municipales d'Igualdá o de Dependencia o de Drogues). Munchos tienen Servicios de Normalización financiaos pol Principáu d'Asturies y aprobaron Ordenances d'Usu del Asturianu por unanimidá de tolos grupos políticos.