Noticies

Da-y al play!

Xun
17
dayalplay

Ayeri nel plenu de la Xunta Xeneral pasó dalgo importante pa la llingua asturiana: la mesa d’edá con representantes de Podemos demostró'l cambéu xeneracional, funcionó y, pela primer vez, punxo a andar esta décima llexislatura usando l’asturianu. Esti fechu súmase al usu del asturianu nos actos protocolarios de toma de posesión de dellos diputaos y diputaes d'Izquierda Xunida y Podemos, y a un bon número de conceyales, alcaldes y alcaldeses de partíos de tolos colores políticos que yá lo fixeran el sábadu pasáu.

Posted By xdla lleer más

Puntu final a unos años llamentables del Gobiernu del PSOE pal futuru de la llingua asturiana

Xun
05
pitalluanco

Acaben trés años d’una de les llexislatures más demoledores de la política institucional del PSOE d'Asturies pa col asturianu. Y ye que más que l'enllancamientu avezáu de la escasa actividá del departamentu encargáu de la supuesta “política llingüística” asturiana, pue falase d’un retrocesu claru. Non solo na visibilización y espardimientu de la llingua sinón, mesmamente, n'ámbitos que, como l’educativu, el mediáticu y el de la toponimia, taben na marxinación y precariedá permanente y qu’agora, depués d’años de desidia malintencionada y incompetencia proverbial, tán peor: nun tris de que’l asturianu desapareza d’ellos.

Posted By xdla lleer más

La XDLA crítica l'actitú represiva hacia l'asturianu na xornada electoral y pide a los partíos políticos pasos alantre pa iguar estes situaciones

Mayu
27
papeletes

Depués de que la Xunta Electoral validara les papeletes n'asturianu d'Andecha Astur -anque namás nel recuentu y ensin poder aparecer nes meses electorales-, esti partíu denunció qu'en plena xornada electoral y a lo menos nun cientu de meses taben retirándose les sos papeletes. Con una intencionalidá represiva hacia'l nuestru idioma, dellos interventores reinterpretaron la resolución de la Xunta Electoral y retiraron toles papeletes d'esti partíu políticu. Mesmamente, anque tuvieren en castellanu. Pa la Xunta pola Defensa de la Llingua Asturiana (XDLA) esta actitú muestra la represión y el castigu exercíu sobre los asturfalantes y l'incumplimientu de la llexislación vixente, tanto a nivel asturianu como español y européu. Por eso, la XDLA pide a tolos partíos políticos que van tar representaos na Xunta Xeneral nueva que dean pasos alantre pa poner fin a estes actitúes propies d'un periodu predemocráticu.

Posted By xdla lleer más

RTPA y llingua asturiana: ¿Agora qué?

Mayu
20
ofirtpa

A pesar de los pasos alantre daos na Selmana de les Lletres, l'usu del asturianu na RTPA vuelve ser una anécdota y ye grave sobre manera la inexistencia de programación infantil nel nuestru idioma.

Posted By xdla lleer más

La XDLA acusa al Conceyu d'Avilés d'incumplir la llegalidá toponímica

Mayu
13
avilés

La marquesina de Les Meanes y los indicadores de la rotonda d'entrada a la ciudá recueyen formes que nun respeten los nomes oficiales

Hai meses, la Xunta pola Defensa de la Llingua Asturiana (XDLA) esixó al Conceyu d'Avilés qu'ordenara modificar el diseñu orixinal de la marquesina de 15 metros de llargor que diba acoyer los servicios de tresporte d’autobuses del barriu de Les Meanes. El motivu yera que'l diseñu orixinal contemplaba recoyer unes lletres xigantes col nome de "Las Meanas", forma única que yá nun existe llegalmente dende'l 2010, cuando col preste de Conceyu y Gobiernu autonómicu'l barriu pasó a ser oficialmente "Les Meanes/Las Meanas". Sicasí, desque s'instaló la infraestructura, nella namás aparez (con unes lletres muncho más pequeñes que les del diseñu inicial) la forma acastellanada "Las Meanas".

Hai que recordar que’l procesu d’oficialización de la toponimia asturiana tien como fin la recuperación de los nomes tradicionales, polo que nun vemos meyor forma de visibilizar y poner en valir el nome popular del barriu que poniéndolu nuna de les zones más transitaes de la ciudá. Con too, parez que'l Gobiernu de Pilar Varela nun quier qu'esto pase y que'l nome dáu al llugar polos avilesinos dende hai sieglos ocupe'l sitiu que merez.

A too esto hai qu'añadir que nos indicadores de carretera nuevos instalaos na rotonda d'entrada a Avilés pela autopista aparecen formes que tampoco nun son oficiales, como "Gijón" o "Luanco". Por eso, la XDLA vuelve recordar al Conceyu d'Avilés y a tol equipu de Pilar Varela que tán obligaos a cumplir cola llei, tamién nesta matería. Hai que reseñar que’l procesu de recuperación de la toponimia, onde participen espertos y vecinos, surde por mor del consensu políticu y social qu'existe a favor de respetar los nomes tradicionales. Según esplica la llei, los nomes oficiales nuevos tienen qu'aparecer en tolos documentos y nos carteles indicadores. Por eso, lo contrario -lo que ta faciendo'l Gobiernu del PSOE n'Avilés- ye dir contra la llexislación vixente.

Posted By xdla lleer más

Discursu pola reconocencia de l'ALLA 2015

Mayu
13
mani2015

En nome de la Xunta pola Defensa de la Llingua Asturiana queremos dar les gracies a l’Academia, a los académicos y académiques, por facer esta reconocencia pública al nuestru llabor de reivindicación llingüística y de la oficialidá a lo llargo d’estos más de trenta años.

Posted By xdla lleer más

Manifestación OFICIALIDÁ!!!!

Mayu
06
mani2015

Esti vienres 8 de mayu a les 19:30 hores convocámoste a la manifestación pola oficialidá del Día de les Lletres Asturianes.
Ye una fecha a la que naide pue faltar porque ye cuando se fai visible'l compromisu ciudadanu con una reivindicación que busca un futuru dignu pal asturianu y que sigue ensin atopar respuesta nos partíos gobernantes.
Amás, como sabes, esti añu l'Academia de la Llingua Asturiana va facenos una reconocencia pública pol llabor d'estos más de 30 años de llucha pola oficialidá. Por eso, tampoco nun pues faltar nel actu del Campoamor, porque tu yes parte d'esi llabor, d'esa llucha qu'entamemos va munchos años, pero na que nun vamos aparar.

Puxa Asturies
Puxa l'asturianu
L'asturianu, llingua oficial

Posted By xdla lleer más

XXVII Conciertu pola Oficialidá

Abr
27
27conciertu

¡Sábadu 2 de mayu en Xixón!. Esa ye la fecha que yá podéis dir acutando nes axendes pa dir al #Conciertu pola #Oficialidá d'esti añu en Xixón.
+Sábadu 2 de mayu Xixón!!!!!
+Apertura puertes 19h
+Sala Acapulco-Casinu d'Asturies.
+Grabación en directo pa CD.
+Alienda
+K-Nalón
+Felpeyu
+Dixebra
+Adizión Etílica
+Dj Antistailo
+barra colos precios de siempre
+Anticipaes 8€
+Puerta 10€
Vémonos en Xixón el sábadu 2 de mayu, nel XXVII Conciertu pola Oficialidá. ¡Oficialidá con toles lletres!

Posted By xdla lleer más

Acción: #OFICIALIDÁ con toles lletres, en CANDÁS

Abr
09
candás

La Xunta pola Defensa de la Llingua Asturiana (XDLA) quier mostrar la so esmolición pola situación del procesu de recuperación toponímica. Va poco, publicóse nel BOPA'l decretu que modifica la toponimia del conceyu de Bual, nome tradicional que dende febreru del añu pasáu yera la única oficial. Sicasí, según el decretu nuevu, esta villa del occidente asturianu pasa a llamase oficialmente Boal/Bual. Asina, y por mor de les presiones y la campaña de manipulación d'un mediu de comunicación, dase un pasu p'atrás na recuperación de los nomes populares depués de que se diera un pasu alantre. Nun se pue escaecer que la Xunta de Toponimia creóse pa recuperar y poner en valir la forma popular cola que los vecinos nomen a los sos llugares. Amás, ye'l Conseyu de Gobiernu'l qu'aprueba los topónimos, pero failo depués d'un trabayu de campu rigorosu y de les aportaciones de los vecinos y del mesmu Conceyu, con un periodu previu de consultes y alegaciones. Too eso inórase y despréciase namás que se crea una polémica mediática: la presión del Gobiernu llega a la Xunta de Toponimia y esta acepta cambiar lo que primero aprobara d'otra manera.
La XDLA quier criticar la dexadez de funciones de la Conseyería de Cultura y de la Dirección Xeneral de Política Llingüística, con competencies nesti terrén al traviés de la Xunta de Toponimia, pero que nesta llexislatura namás recuperó oficialmente la toponimia de tres conceyos -Bual, Valdés y Santu Adrianu-, produciéndose asina un parón nun procesu d'años que, anque hasta'l momentu diba despacio, parecía dir hacia alantre con pasu firme.
Otra manera, nesta llexislatura tamién se produció la modificación de dellos topónimos recoyíos nel decretu de Carreño, que pasaron a aprobase con denominaciones dobles. Ye de reseñar que Carreño llevaba cuasi una década cola so toponimia aprobada y que foron la desinformación y les presiones d'un mediu de comunicación les que fixeron que'l procesu fora hacia atrás.
Por too esto, y concidiendo colos diez años desque s'aprobaren los tres primeros decretos de recuperación de la toponimia tradicional -Carreño, Llanes y El Franco-, la XDLA convoca una acción nueva dientro de la campaña #Oficialidá: con toles lletres. L'actu va celebrase esti sábadu 11 d'abril a les 11 de la mañana nel muelle de Candás.

Posted By xdla lleer más

2 de mayu: XXVII Conciertu pola Oficialidá

Mar
22
27ConciertuOficialidá

¡Sábadu 2 de mayu en Xixón!. Esa ye la fecha que yá podéis dir acutando nes axendes pa dir al Conciertu pola Oficialidá d'esti añu.
Volvemos a la época avezada del conciertu, calentando motores pal Día de les Lletres que va ser la selmana siguiente.
Sigui esti eventu, onde los próximos díes y selmanes vamos dir actualizando tola información y novedaes (entraes, cartel, grupos, materiales y munches coses más).
Vémonos en Xixón el sábadu 2 de mayu, nel XXVII Conciertu pola Oficialidá. ¡Oficialidá con toles lletres!

Posted By xdla lleer más

Páxines