¿Pa quién ye "escesiva" la programación n'asturianu de RTPA, Antonio Virgili?

La XDLA critica a Foru y Ciudadanos por mostrase en contra d'aumentar el porcentaxe d'emisión n'asturianu cuando ye dalgo que marca la Llei d'Usu, que tanto dicen defender cuando nieguen la necesidá de la oficialidá

La Xunta pola Defensa de la Llingua Asturiana (XDLA) pide al director xeneral de RTPA, Antonio Virgili, qu'esplique pa quién ye escesiva la programación n'asturianu qu'actualmente s'emite en RTPA. Virgili afirmó na Comisión de Control de RTPA na Xunta Xeneral, énte les crítiques de dellos partíos pola poca presencia del nuestru idioma na radiotelevisión pública, que la programación n'asturianu “pa dalgunos ye escesiva y pa otros ye curtia; nós tratamos de buscar el permediu”.

La XDLA recuerda que la TPA emite menos de cinco hores a la selmana de conteníos nel nuestru idioma, mentes que na RPA l'espaciu pal asturianu queda namás en diez minutos de llunes a vienres. Igual pa Virgili esto ye'l “permediu” y mesmo podrá haber xente qu'esto-y paeza escesivo, porque la intolerancia dase en tolos llaos. Con too, lo que marquen l'Estatutu d'Autonomía, la Llei d'Usu del Asturianu y la Llei de RTPA ye que la cadena tien que ser una parte activa nel procesu de promoción de la llingua asturiana, polo qu'equí nun val lo que puedan opinar unos o otros: RTPA tien que cumplir cola llexislación vixente.

De la mesma manera, la XDLA refuga la posición que mostraron Foru Asturies y Ciudadanos nes comparecencies de los miembros nuevos del Conseyu d'Alministración de RTPA. Precisamente, estos mostráronse a favor de que la cadena cumpliera cola llei no que tien que ver cola emisión de conteníos n'asturianu, dalgo que criticaron tanto la diputada de Foru Carmen Fernández como la de Ciudadanos, Diana Sánchez, porque “l'asturianu nun ye oficial”.