“El rostu impenetrable” supera la media d’audiencia de TPA
posted by xdla
on Llu, 30/12/2013 - 19:50
La primer película n’asturianu emitida pela televisión pública tuvo un 5,1% d’audiencia y foi ún de los espacios más vistos del día
La emisión de la primer película doblada al asturianu emitida por TPA -One-Eyed Jacks, que na versión nel nuestru idioma recibió’l títulu d’El rostru impenetrable- tuvo una acoyida bona ente l’audiencia de la nuestra canal pública. Asina, mentes la media del día en TPA foi del 4,9%, la cinta protagonizada por Marlon Brando llegó al 5,1, tando amás perriba de la media del mes, que quedó nun 4,7%. La película tuvo ente los espacios más vistos del 27 d’avientu y namás foi superada poles ediciones del mediudía y la nueche del TPA Noticias y por otru programa n’asturianu: Güelos, qu’algamó un 6,5% d’audiencia. Los datos muestren la espectación que xeneró la emisión. Por exemplu, los espacios programaos enantes d’El Rostru Impenetrable tuvieron perbaxo de la media de la cadena –Date una vuelta, 3,9% y Superasturianos, 4,5%-. Per otru llau, la película de la tarde tamién tuvo perbaxo d’esta media, al quedar nun 4,4%.
El share de la película n’asturianu –que competía con dalgún de los programes de más éxitu de la televisión española- y de Güelos –hai que reseñar que yera una reemisión- muestren que n’Asturies nun tien sentíu una televisión pública que nun reflexe la nuestra identidá y el nuestru idioma. Como muestra val que la emisión d’El Faro, telenovela en gallegu participada por TPA y que n’Asturies emítese doblada al castellanu, quedó nun testimonial 0,2%. Per otru llau, ye de reseñar l’audiencia social de la película –datos qu’analicen cómo l’audiencia interactúa col programa al traviés de les redes sociales-. Asina, El Rostru Impenetrable, al traviés del hashtag #ElRostruImpenetrable, foi ún de los espacios más comentaos na nueche del vienres ente los usuarios de Twitter n’Asturies, xenerando más d’un 80% de comentarios positivos. Asina, muestren un grau altu d’aceptación ente la xente mozo, una audiencia que, según les encuestes, nun suel mirar la cadena pública.
Ente estos datos –l’aceptación pola audiencia del doblaxe, sobre too ente la mocedá-, la XDLA vuelve a pidir que la emisión d’esta película nun quede nun casu aisláu y sía’l puntu d’arrinque pal nacimientu d’una industria del doblaxe n’Asturies, coles consecuencies positives qu’esto tendría pal empléu nel sector audivisual. Asina, l’asociación quier volver a recordar la importancia de facer un apueste pola emisión de dibuxos animaos n’asturianu. Hai que destacar que TPA ye la única televisión europea d’una comunidá billingüe que nun emite programación pa los más neños na llingua propia. Amás, esta programación podría xugar un papel importante como material lúdico pa les clases d’asturianu.
Ye de reseñar que, nel mesmu horariu nel que TPA tien un 0,2% de share con El Faro, cadenes como TV3 o TVG llegaron al 30% d’audiencia cola emisión de series xaponeses d’animación como Dragon Ball o Shin-Chan. Pa la XDLA, la espectación xenerada con El Rostru Impenetrable muestra que nel nuestru país podría pasar dalgo asemeyao. Nesti contestu, la programación infantil n’asturianu pue convertise nesi puntu d’enganche que necesita la canal -qu’actualmente tien menos del 5% d’audiencia y arrecostina cola época de menos siguimientu de la so historia-. Asina, la emisión de dibuxos animaos nel nuestru idioma pue valir pa espertar la ilusión de los ciudadanos pola so televisión y aumentar l’audiencia, dalgo fundamental p’asegurar el futuru de la cadena y la so aceptación social.