Ataque a la viabilidá de los medios n'asturianu
posted by xdla
on Vie, 24/07/2015 - 10:34
La organización denuncia un intentu del Gobiernu asturianu d'acabar, añu tres añu y pasín a pasu, col presupuestu dedicáu a la normalización llingüística.
El BOPA acaba de publicar la convocatoria de subvenciones pa medios de comunicación pal fomentu del usu del asturianu, onde se recueye un recorte de 47.000 euros -37% menos que l'añu anterior y un 81% menos comparao con cifres del 2010-, polo que la cantidá queda en 80.000 euros. Pa la Xunta pola Defensa de la Llingua Asturiana (XDLA) esti fechu supón un ataque grave a la viabilidá de los proyectos informativos n'asturianu y un intentu claru d'acabar, añu tres añu y pasín a pasu, col presupuestu que la Dirección Xeneral de Política Llingüística dedica a les ayudes a los medios de comunicación, un sector que ta siendo de los más castigaos pola crisis económica. Los fechos son tovía más graves si tenemos en cuenta que los medios de comunicación son fundamentales pa que l'idioma propiu d'Asturies algame'l rangu social de normalidá.
Mesmamente, l'Estatutu d'Autonomía y la Llei d'Usu afiten que'l Gobiernu asturianu tien qu'ayudar a los medios qu'utilicen el nuestru idioma. Sicasí, l'Executivu paez actuar pa impedir l'afitamientu del asturianu nos mass media, la sostenibilidá d'estos medios, la so independencia económica y la so llibertá de prensa. Ye de reseñar que PSOE y IX acaben de llegar a un pactu d'investidura onde ún de los principales alcuerdos en materia de política llingüística ye que se va ameyorar la presencia del asturianu nos medios de comunicación. Sicasí, hores depués de la investidura de Javier Fernández, una de les primeres midíes que publica'l Gobiernu dexa bien claro cómo se mete la tisoria peles ayudes al asturianu.
Tamién hai que tener en cuenta cuándo se publica esta convocatoria de subvenciones: a metá d'añu y con quince díes hábiles pa presentar la documentación. Esta tardanza na xestión fai que dalgunos medios esperen a que se conceda la subvención pa facer el proyectu, colo que namás apaecen conteníos n'asturianu dos o tres meses a final d'añu. Esta situación pon mui dificíl la viabilidá y continuidá de cualquier proyectu nesti 2015. Per otru llau, ye de reseñar qu'añu tres añu, el Gobiernu castiga a los medios de comunicación n'asturianu nun poniendo nellos publicidá institucional, colo que s'imposibilitá'l nacimientu de cualquier ufierta nueva que quiera tener l'asturianu como llingua vehicular y con unos recursos económicos dignos pa los profesionales.
Asturies y la so cultura necesiten medios de proximidá qu'ayuden a difundir y prestixar el so idioma, que visibilicen la so existencia y tola actividá cultural y económica que xeneren. Por eso, ye imprescindible la existencia de medios d'asturianu y tamién qu'esti idioma tea presente nos medios que mayoritariamente utilicen el castellanu. Ye imprescindible que los profesionales de la información que pueden y quieren utilizar esti idioma nun se vean condenaos a la precariedá. Ye dalgo fundamental nuna sociedá que s'autoproclama democrática como la nuestra.