Barbón nun pue dexar que la ultraderecha-y marque'l pasu'l en política llingüística
posted by xdla
on Vie, 30/10/2020 - 10:15
Esti martes 27 d'ochobre, cuasi a la mesma hora que’l presidente Adrián Barbón lleía unes palabres n’asturianu y en gallego-asturianu nel plenu de la Xunta Xeneral, el plenu del Conceyu de Siero refugaba a iniciativa de Vox la toma en consideración d’una propuesta namás porque taba presentada n’asturianu. Y fíxolo amás cola complacencia del alcalde socialista Ángel García, que diz que ye como si daquién presenta una moción en chinu, qu'él el chinu nun lo entiende.
Dicimos en concreto que’l presidente Adrián Barbón lleía eses palabres porque, pa poder pronunciales, paez tuvo primero qu’apurrir a los diputaos de Vox una traducción al castellanu.
Quier dicise que non solo los conceyales de Siero nun puen usar llibremente l'asturianu. Ye que nin siquiera’l presidente d’Asturies pue facelo nos debates na Xunta Xeneral: una minoría d'estrema derecha nun-y dexa. Namás-y dexen, o perdónen-y, que pueda lleer y namás lleer si primero-yos apurren la versión en castellanu.
La ultraderecha pue quitar de qu’Adrián Barbón o cualquier otru cargu electu pueda falar n’asturianu porque hasta que l’asturianu nun se reconoza como llingua oficial los derechos llingüísticos de los sos falantes nun esisten. Son namás concesiones al debalu y al caprichu de cualquier reaccionariu.
El martes tamién, unes hores más tarde, el Conceyu de Corvera sofitó una moción propuesta pola Xunta pola Defensa de la Llingua Asturiana, pidiendo a la Xunta Xeneral que reconoza l'asturianu y el gallegu-asturianu como llingües oficiales. La moción aprobóse colos votos a favor de Podemos y Izquierda Xunida, pero cola abstención del PSOE, qu’argumentó que la reforma del Estatutu nun ye urxente porque la prioridá agora ye la llucha contra'l Covid 19.
La Xunta pola Defensa de la Llingua Asturiana vuelve pidir al PSOE y al Gobiernu que preside Adrián Barbón que nun s'escuenda detrás del virus. Ye tiempu de reconocer derechos. Ye tiempu d’acabar con imposiciones antidemocrátiques.
¿Pue sobrevivir una llingua si nin siquiera’l presidente pue usala llibremente? ¿Pue siquiera protexese y promocionase una llingua que ta na práctica prohibida?
¿Va siguir aceptando’l presidente Adrián Barbón la humillación de qu’una minoría d’ultraderechistes-y dicte cuándo pue y en qué condiciones usar l’asturianu? ¿Va siguir consintiéndolo’l PSOE?
Nun ye'l momentu d'esperar y mirar pa otru llau. Ye'l momentu d'actuar y encarar la reforma estatutaria pa incluyir la oficialidá.