Da-y al play!

dayalplay

Ayeri nel plenu de la Xunta Xeneral pasó dalgo importante pa la llingua asturiana: la mesa d’edá con representantes de Podemos demostró'l cambéu xeneracional, funcionó y, pela primer vez, punxo a andar esta décima llexislatura usando l’asturianu. Esti fechu súmase al usu del asturianu nos actos protocolarios de toma de posesión de dellos diputaos y diputaes d'Izquierda Xunida y Podemos, y a un bon número de conceyales, alcaldes y alcaldeses de partíos de tolos colores políticos que yá lo fixeran el sábadu pasáu.

Naguábemos por dir dexando atrás el tiempu nel que’l movimientu de reivindicación llingüística denunciaba los atentaos que vegada tres vegada venía padeciendo la nuestra llingua nesa mesma sede.

Espérennos, de xuru, plenos nos que vamos sentir debater na nuestra llingua sobre investidures, aprobación de presupuestos, redacción de lleis o control al gobiernu. Esperamos tamién que lo que nun va ser un conflictu pal funcionamientu de la Xunta Xeneral (nun pue selo) seya tamién normal na vida de tolos asturianos y asturianes, y que l’usu del asturianu llogre d’una vez l'estatus de llingua oficial.

Préstanos ver na cámara que representa la voluntá del pueblu asturianu la grana semada en tantos años de reivindicación llingüística, porque bien sabemos que la Xunta Xeneral ye l’asamblea que tien que decidir pone-y fin a la situación de discriminación llingüística que sufren los y les falantes d’asturianu y que yá nun se pue sostener más tiempu.