Discursu Día Lletres 2014

mani2014

 

Güei ye'l Día de les Lletres Asturianes, un día de festexu, pero tamién un día de reivindicación. Festexamos qu'esta llingua nuestra siga viva tovía na voz de munchos asturianos y asturianes, pero tamién reivindicamos que los responsables políticos tomen les midíes necesaries pa poner remediu al procesu de desaparición que ta sufriendo.


Nun vos preocupar: esti día, pa presentar la Selmana de les Lletres, dixo la conseyera d'Educación que lo de la normalización y la toponimia y eso... que va bien. Y que, si eso, van ver si topen tiempu pa pidir al Ministeriu lo de la especialidá de primaria y secundaria. Que lo van intentar, que por intentalo que nun quede, ho. Y quedó tán ancha.

Vamos falar claro: na so aparición añal pa falar de “lo del asturianu” (porque nun vamos volver a vela más nestos menesteres), vese que se punxo en plan "a ver qué digo d'esto que nun me da muncho más y a lo que nun tengo pensao averame nin de casualidá en tola selmana".

Y, claro, cualquier persona medianamente interesada nun futuru dignu pa la nuestra llingua diose cuenta de que la improvisación y el desdexamientu son les úniques blimes coles que la señora conseyera fai esos cestos tan malcuriosos.

De qué normalización ta falando Ana González, que nun usa l'asturianu nin pa presentar la Selmana de les Lletres y nun foi a nengún de los actos que la Dirección Xeneral de Política Llingüística entamó.

De qué avance na toponimia ta falando si nos últimos años vamos a un ritmu binariu d'aprobación d'espedientes: un añu, cero; otru añu, ún. Y depués, los que s'aprueben nun se cumplen nin se defenden de los ataques xabaces d'un famosu mediu de comunicación que toos conocemos...

¿Qué normalización ye esa que depués de 10 años de la creación de la RTPA tenemos qu'andar tirando voladores porque se ponga una película, porque retresmitan un partíu pela radio o se dean unos minutinos d'información que, otra manera, tuvimos que dir arrampuñando cola fuercia de la insistencia, la movilización, la razón y la reivindicación?

¿Qué normalización ye la que tenemos na Educación, onde s'anuncia, cola galbana y hipocresía avezada, que van ver de pidir al Ministeriu la imprescindible y milenta veces prometida Especialidá de Llingua Asturiana pa Primaria y Secundaria y, al mesmu tiempu, afóndase na precarización de la situación del idioma na enseñanza con recortes, falta de previsión y inestabilidá permanente p'alumnáu y enseñantes?

¿Qué normalización ye la de los conceyos, con servicios llingüísticos condenaos a la precariedá perpetua o a la desaparición?

Pa que'l discursu que gasten los nuestros políticos pueda llegar a convencer tendrán que se convencer ellos primero. Nun nos valen declaraciones pa salir del pasu una vez al añu, que repiten y repiten promeses que nun creen nin tienen pensao cumplir.

Pero'l tiempu y la paciencia pa con estos trapaceros de la xestión política va acabando. Cada día, les mentires coles que quieren entretenenos hasta que quedemos ensin nengún de los nuestros derechos, trágales menos y menos xente.

Cada día vese meyor que l'únicu problema ye'l d'ellos, que los prexuicios son d'ellos, que l'autodiu ye'l d'ellos y el de los qu'usen pa la represión de los derechos llingüísticos en tolos ámbitos.

Y ye que les coses tán camudando, cada día podemos comprobar como cualquier tipu de productu, creación o emisión na nuestra llingua tien un siguimientu, una repercusión o unes audiencies que puen superar ensin dificultá lo qu'intenten metenos pelos güeyos los medios al serviciu de la clas dirixente y el poder económicu.

Cada día ta resultándo-yos más dificil tapecer la realidá del mundu que s'espresa y llucha por siguir espresándose n'asturianu y la d'una xente que sigue y demanda esos espacios onde alienden les posibilidaes de futuru de la nuestra llingua.

Dende la Xunta pola Defensa de la Llingua llevamos meses faciendo rescamplar que que la TPA nun emita n'asturianu nun ye namás una anormalidá manifiesta nel marcu européu, sinón qu'amás ye una amenaza cierta pa les sos posibilidaes de supervivencia. Queremos, como dicimos nel manifiestu “5 puntos por unos medios públicos al serviciu d'Asturies” que sofitaron bien d'organizaciones de la sociedá civil asturiana, que l'ente públicu de comunicación sobreviva y se revitalice como una ferramienta al serviciu de los asturianos y asturianes, y como un mediu fundamental y imprescindible al serviciu de la normalización llingüística.

Tamién llevamos bien de tiempu con campañes sistemátiques pa que se cumpla la toponimia oficial, porque tenemos que ver una y otra vez cómo ministerios, conseyeríes, conceyos y medios de comunicación inoren los espedientes aprobaos y publicaos nel BOPA dende va años. La denuncia constante y la implicación de tola xente esmolecío por estos incumplimientos xeneralizaos ye la única manera de dir avanzando nel cumplimientu y visibilización de la llegalidá.

Como veis, el llabor ha ser contante y ensin posa. Cada mínimu espaciu, cada programa, cada emisión, cada especialidá, cada esperiencia, cada proyectu nun nos lu van regalar. Va haber qu'arrincá-yoslu, como vien siendo siempre la nuestra historia. Historia d'una reivindicación, d'un movimientu social arguyosu de facer lo que quier y cree, apoyáu na razón.

Que nun nos engañen. Eso que llamen ellos normalización y política llingüística nun lo ye, nun merez esi nome. N'Asturies, hasta la fecha, hubo bien poco d'eso. Nun hubo nada que, asumío por tola alministración, y cola coordinación, planificación y tresversalidá necesaries, diera respuesta a un programa eficiente de revitalización llingüística. Lo que tenemos ye otra cosa: ye una mázcara, un parapetu que fai por parar les reivindicaciones, les esperances y les demandes populares. Un parapetu que tien la misión de nun dexanos llegar al sitiu onde los derechos diben danos la posibilidá d'un futuru.

Esta situación de bloquéu y negación de los nuestros derechos a lo llargo de décades nun ye otro qu'una de les formes, y non la menos gafa, que la corrupción política garra n'Asturies. Efectivamente, con mecanismos les más de les veces vergonzantes, les élites polítiques y económiques d'Asturies construyeron una realidá que mantenía y mantién intactu'l statu quo de la concepción cultural franquista y el so proyectu de sustitución y uniformización llingüística.

Por eso vamos siguir siempre nel camín de la llucha y la reivindicación, porque ye un llabor estrictamente necesariu pa llegar a una sociedá digna y democrática. Porque ye'l camín pa tener la posibilidá d'un presente razonable y un futuru decente.

Y como esto nun apara nunca, mañana mesmo podéis averavos a les 11:30 a la Plaza Cubierta de La Pola Siero pa participar na grabación d'un videu musical cola famosa canción de los vasos onde se quier demostrar el futuru que tien la llingua.

Tamień vos convidamos a acudir un añu más al 26 Conciertu pola Oficialidá, qu'anguaño ye en Xixón el 7 de xunu, pero nun escenariu nuevu: va ser delantre del Acuariu de Xixón, no qu'antaño foi l'Arenal de Pando o Playa'l Natahoyo y que los políticos municipales discurrieron de llamar "de Poniente", seguramente pensando nel Mediterraneu.

Empezábemos diciendo qu'esti ye un día de celebración de la nuestra lliteratura y de reivindicación del status de llingua oficial pal nuestru idioma. Y ye verdá, como tamién ye verdá que tan importante como lluchar y reivindicar güei, ye facelo tolos díes, en tolos ámbitos y circunstancies. Esi ye'l camín que va facer que la nuestra llingua se fale, se sienta, se llea y se cante. Y ye'l camín que va facer qu'esto se siga faciendo muncho tiempu depués de que los que torgaron los derechos llingüísticos asturianos tean nel trasteru de la historia.
 

¡Puxa Asturies!

¡L'asturianu, llingua oficial!