Homenaxe a Yolanda Huergo con música y compromisu

La Xunta pola Defensa de la Llingua Asturiana entama pa esti domingu 26 de setiembre a les 12:30 hores un homenaxe a la que foi la so compañera, militante na organización, Yolanda González Huergo, fallecida'l 6 d'agostu del 2020. Nel actu va haber música de la mano de grupos como Felpeyu y L-R, amás d’intervenciones de persones que conocieron a Yolanda y el so compromisu social y políticu.
El Muséu del Pueblu d’Asturies de Xixón va ser l’escenariu que va acoyer l’homenaxe a Yolanda. Por mor de les restricciones derivaes de l’andanciu, nun se pudo entamar primero esti actu de reconocimientu que quier reparar na persona, no qu’ella significó na defensa de la llingua asturiana, amás de nuna montonera más de causes nes que Yolanda participó a lo llargo de la so vida. Asina, la xornada va ser una mirada señaldosa a lo qu'ella foi, pero tamién una mirada al futuru enllena de tol compromisu qu’amosó Yolanda na so vida.
La música d'esti país nun podía faltar nun homenaxe a una persona que la vivió de manera intensa, y asina van tar dos de los grupos de los que Yolanda disfrutó munches vegaes: Felpeyu y L-R. Pero tamién va haber voces que van falar d'aquello no que Yolanda invirtió munches hores, el compromisu coles coses nes que creía. Va falase de tol trabayu de Yolanda lluchando pola diginidá y oficialidá de la llingua asturiana, pero tamién del so llabor en defensa de los derechos humanos cuando militó n’Amnistia Internacional, o la xera en distintes organizaciones polítiques que la llevó nos últimos años a ser conceyal nel Ayuntamientu de Xixón por Podemos Asturies.
Dende la Xunta convidamos a tol mundu a acompañanos esti día n'alcordanza d’esta persona y de tolo que significó y va significar.