La XDLA, énte'l congresu de la FSA

Como se sabe, esti 23 de setiembre presentóse’l Proyectu 2018 pola oficialidá, una campaña de la Xunta pola Defensa de la Llingua Asturiana (XDLA) que quier rematase, primero de qu’acabe esti cursu políticu, cola declaración de la oficialidá modificando l’artículu 4 del Estatutu d’Autonomía pol procedimientu que la mesma llei orgánica afita.

Como se vio nel actu de presentación, la nuestra demanda ta avalada pola Universidá d’Uviéu, pola Academia de la Llingua Asturiana, por un sector grande de la Xunta Xeneral y por bona parte de la sociedá asturiana, organizada o non, que simpatiza cola XDLA y que taba’l sábadu sofitando la reivindicación. Pola asistencia que rexistró, l’actu foi una demostración cívica a favor de la oficialidá que nun se pue callar nin facer de menos.

El respetu pola llingua asturiana yá caltrió ente los sectores más civilizaos de la sociedá. L’alfabetización de les xeneraciones más moces ye güei una realidá. Urxe adaptar el marcu llegal del asturianu y del gallego-asturianu a la realidá del sieglu XXI: la normativa europea esíxelo, les nueves formes de comunicación fáenlo imprescindible.

La Llei d’usu y promoción del asturianu, amás de tar vencida y superada, ye güei un arma en manes de los que quieren reprimir les llibertaes llingüístiques, que la sopelexen namás en negativo. Nel so nome recúrrense les ordenances d’usu municipales poles que puxen los conceyos, nel so nome impídese que nin siquiera una comision de la Xunta Xeneral pa falar del rexime de protección del asturianu pueda convocase n’asturianu… Ablucante.

Bien llueu, si sigue pasando’l tiempu ensin facer nada, lo único positivo que se va poder dicir de la situación llegal del asturianu ye que nel ámbitu priváu nun ta prohibío falalo.

Afortunadamente, como esplicamos nel nuestru videu promocional, la reforma del Estatutu d’Autonomía pue aprobase con una mayoría cualificada de los miembros de la Xunta Xeneral. El cambéu de posición del grupu socialista nesti asuntu algamaría pa llograr esa mayoría y que nengún grupu la pueda boicotiar col so votu en contra.

Esti fin de selmana los güeyos del asturianismu cultural van tar puestos nel congresu de la FSA esperando qu’esta vez tea al altor de la historia. Ye responsabilidá de la executiva nueva que caltrie la idea de que la defensa de los derechos llingüísticos d’asturianos y asturianes tien que ser parte del ADN del partíu.

Munchos militantes socialistes saben que la oficialidá del asturianu y del gallego-asturianu ye inevitable, porque ye’l reconocimientu d’un derechu ciudadanu. Un derechu que nun almite más espera, porque tamién ye l’empiezu del trabayu pola salvación de la llingua. La implementación progresiva de midíes tien que poder encontase nuna base llegal sólida.

Yá ye yá: la reforma pue y tien que s’aprobar nesti cursu políticu. D’equí a la primavera del 2018 hai tiempu abondo pa consensuar la redacción qu’ha tener l’artículu 4 del Estatutu d’Autonomía y llevalo a la cámara. Ye namás cosa de voluntá, nun valen sides.