La XDLA acusa a Javier Fernández d'usar l'argumentariu de los sectores ultraconservadores contra l'asturianu

javifer

El presidente asturianu avisa de los "riesgos identitarios". ¿Qué ye, qu'él nun tien identidá?

La Xunta pola Defensa de la Llingua Asturiana (XDLA) quier refugar les palabres del presidente del Gobiernu asturianu, Javier Fernández, qu'esti martes volvió rellacionar la oficialidá del asturianu con "obligaciones" y faló de grupos que quieren usar l'idioma como “factor d'identidá”.. La organización nun ye a entender cómo una persona que se diz progresista ve los derechos cuidadanos como una amenaza, como fixeron y siguen faciendo los sectores ultraconservadores contra derechos como'l divorciu, l'albuertu o la igualdá del colectivu LGTB.

Nun actu en Madrid esti martes, Javier Fernández llegó a dicir qu'había "xente enfotao" en rellanzar l'elementu d'identidá, dalgo que califició como un “riesgu”, amás d'afirmar qu'ensin llingua “nun hai nacionalismos". Nun sabemos si'l presidente ye partidariu d'un procesu d'etnocidiu llingüísticu y d'eliminar amás los horros, l'arte asturianu, Cuadonga, el paisaxe o la gastronomía asturiana pa que'l territoriu quede llibre de cualquier posible peligru identitariu.

Parez que'l xefe del Executivu autonómicu descubre l'océanu al dicir que les llingües son elementos d'identidá. Eso sí, namás l'asturianu y la qu'él usa nun lo ye. ¿Qué ye, que Javier Fernández nun tien identidá? ¿O ye que namás val la so identidá y la so llingua y la de los demás sobra y nun merez la mesma consideración en derechos? Con estes palabres Javier Fernández ta usando'l mesmu argumentariu que los sectores ultraconservadores del Estáu.

Ye'l argumentariu d'estos grupos que se sienten amenazaos poles polítiques que busquen la igualdá d'homes y muyeres o d'heterosexuales y gais. Con declaraciones como les de Javier Fernández vese que les idees progresistes quéden-y mui lloñe. Parez que-y queden más cerca les posiciones del partíu de Mercedes Fernández, que, col aplausu d'una minoria ultraconservadora y intolerante, nagua por arrampuñar unos pocos votos a la ultraderecha.

La oficialidá namás que supón la igualdá de derechos ente tolos ciudadanos d'esta tierra y dicir qu'eso podría llevar a riesgos identitarios ye propio d'otres époques predemocrátiques, onde namás se podía usar una llingua: el castellanu. Y esi ye'l mayor exemplu de nacionalismu, el nacionalismu de "'una, grande y libre”. Ye'l momentu de la democracia y non de la intolerancia.
 

La falta de derechos ciudadanos pa una parte de la población d'Asturies ye un problema al que cualquiera que se llame demócrata tien que poner solución namás que se dea la posibilidá. Y la posibilidá ye agora, nesta llexislatura, cola presentación d'una propuesta de reforma del Estatutu d'Autonomía d'Asturies pa incluyir la oficialidá d'asturianu y gallego-asturianu. Los derechos nun s'aplacen a conveniencia con argumentos tan floxos como que "nun procede". Claro que procede. Lleva "procediendo" dende hai más de trenta años ante la pasividá de los partíos mayoritarios n'Asturies. Agora ye'l momentu y nengún demócrata pue aplazar el reconocimientu d'un derechu básicu como ye'l de la igualdá xurídica de les llingües propies d'Asturies.