La XDLA acusa a la dirección de RTPA de poner los medios públicos al serviciu de los sectores contrarios a la normalización del asturianu
A pesar de que dende'l nacimientu de la canal pública la Xunta pola Defensa de la Llingua Asturiana (XDLA) vien criticando la presencia curtia de la llingua y la cultura asturiana, qu'incumple a les clares l'Estatutu d'Autonomía, la Llei d'Usu y la mesma Llei de Creación de RTPA, nesti momentu queremos mostrar la nuestra esmolición por delles escenes que se vienen viendo nes últimes selmanes na radio y na televisión públiques. La primera, que RTPA nun informara sobre la rueda de prensa que dio l'Academia de la Llingua Asturiana (ALLA) pa denunciar los ataques hacia'l procesu de normalización del asturianu.
Y ye que mentes nel Llar de l'ALLA había micrófonos de los principales medios de comunicación del país, rescamplaba l'ausencia del de la televisión que pagamos toos y toes, que silenció la palabra de la principal institución llingüística asturiana. A pesar d'esto, pocos díes depués, TPA Noticias facíase ecu d'una recoyida de firmes n'Uviéu en favor d'una supuesta 'libertad lingüística' de colectivos vinculaos a la estrema derecha y que dicíen defender el derechu a vivir en castellanu nos territorios billingües (¡¡!!). La XDLA nun quier marcar la escaleta de los sos informativos, pero nun tar presente na rueda de prensa d'una institución cultural -y pública- de tanta importancia como ye l'Academia y sí tar informando sobre los actos d'una organización ultraderechista como Hablemos español marca mui bien la llinia ideolóxica que ta siguiendo la cadena baxo'l mandu d'Antonio Virgili.
Otru exemplu tenémoslo en cómo TPA Noticias ye portavoz de les polémiques ficticies que promueven les fuercies conservadores asturianes -encabezaes pol PP y un conocíu diariu uviedín- contra'l procesu democráticu, dialogáu y consensuáu de recuperación de la toponimia tradicional. Les cámares y micros de la televisión pública siempre van tar ehí pa dar voz a los contrarios a esti procesu -que nun fai otro que cumplir cola llei-. Y amás fáenlo siempre d'una forma parcial, partidista, chocando colo que tien que ser la información veraz d'una televisión pública. Esto manca más cuando RTPA sigue ensin cumplir cola llexislación vixente en matería toponímica, tanto nos informativos como nos programes d'entretemientu. Mención aparte merecen la RPA, onde la toponimia oficial –y la mesma llingua-- nin existe, o les nueves anuncies pa la publicidá de TPA onde apaecen topónimos como 'Pajares' o 'Huerna', dalgo que supón un ataque frontal al procesu de recuperación de la toponimia tradicional.
Y, en metá de too esto, una programación d'entretenimientu qu'agora, amás de curtia, ye diglósica; onde nos vienden como espacios n'asturianu programes con presentadores que nun conocen nin la llingua nin les sos normes ortográfiques y onde los grupos más dinámicos de la escena sonora asturiana nun aparecen, mentes una y otra vez se repiten les mesmes voces ensin nengún criteriu nin calidá. Mentanto, na radio la música asturiana nun existe en nengún programa, dalgo que ye a les clares un actu de censura.
Too esto con un fin claru; mostrar que l'asturianu ye una chancia, que nun ye una llingua de cultura que val pa falar de too. Y ye que cola supuesta programación n'asturianu parez que too val y eso pudimos velo nos especiales d'estes navidaes, que sacaron los colores a más d'ún por una cutrez qu'entró dafechu no kisth -too esto en metá d'unes campanaes de fin d'añu onde l'abá de Cuadonga llamó a los asturianos a abrazar a Dios-. Asina, TPA -y nun nos vamos olvidar de la radio- posiciónase del llau de la ideoloxía más conservadora, onde cures, chistes machistes y musica casposa comparten espaciu cola desinformación en castellanu y la chancia y la cutrez, pero, esto sí, nun amagu d'asturianu.
Too val p'afalar la diglosia de la cadena dirixida por Antonio Virgili, que nun podemos escaecer que ta ehí gracies al apoyu de partíos como PSOE y IX. Hai que reseñar que na enmienda aprobada nel últimu Congresu de la FSA, la militancia aprobó que, mentes que nun s'aprobara la reforma del Estatutu, diba fomentase la presencia de la llingua asturiana en RTPA desarrollando la Llei d'Usu.
¿Tendremos qu'esperar tamién al 2019, como dicen dalgunos, pa que Virgili cumpla cola llexislación vixente? ¿La televisión pública va siguir mostrando les fobies y maneres de pensar de Virgili o va responder a la demanda de la mayoría de la sociedá asturiana? ¿Van los partíos políticos con representación parllamentaria siguir dexando que los medios públicos funcionen al serviciu y los intereses d'una minoria?