La XDLA califica l'actitú totalitaria del PP d'ataque grave a los valores constitucionales qu'esti partíu diz defender

cherines y putes y varios

La derecha consigue l'apoyu de los socialistes pa volvenos de golpe al periodu predemocráticu, nun intentu claru d'usar l'asturianu como polémica pa esconder los casos de corrupción qu'afueguen al PP

La Xunta pola Defensa de la Llingua Asturiana (XDLA) quier mostrar la so condena más enérxica al ataque contra los derechos llingüísticos y les llibertaes individuales que'l PP asturianu, col preste de la FSA y Ciudadanos, acaba de llevar alantre. Estos partíos sumaron los sos votos pa impidir que la convocatoria pa una Comisión sobre'l nivel de protección del asturianu pudiera redactase de manera billingüe. Quier dicise, nun permiten que s'use l'asturianu pa falar del so futuru nin anque s'acompañe d'una traducción al castellanu. ¡Nun se nos permite nin la presencia anecdótica y testimonial!

Sicasí, tovía abulta más grave que la presidenta del PP d'Asturies, Mercedes Fernández, mostrara al traviés de les redes sociales lo contenta que taba por “llograr” que los nuestros derechos llingüísticos volvieren al añu 1973, por volver a enantes de que se dieren los primeros pasos pa recuperar la democracia y el patrimoniu llingüísticu. ¿Cómo pue un representante públicu de l'Asturies democrática del sieglu XXI mostrar el so contentu por nun dexar usar l'asturianu na sede de los representantes d'Asturies nin siquiera de manera testimonial?

L'actitú de Mercedes Fernández devuélvenos a décades pasaes, amás de pola so actitú represora y totalitaria, porque diba años qu'un líder políticu nun s'atrevía a posicionase públicamente contra los derechos llingüísticos más mínimos. Hai que tener en cuenta qu'esta votación contra l'asturianu incumple tola llexislación vixente, porque la mesma Llei d'Usu del Asturianu diz que tolos ciudadanos -y los diputaos, miembros de comisiones y personal de la Xunta Xeneral tamién son ciudadanos- tienen derechu a espresase nel nuestru idioma de palabra y por escrito, estableciendo amás que van tenese por válides toles comunicaciones orales o escrites nesta llingua. Con too, nun nos pue estrañar l'actitú antidemocrática de Mercedes Fernández, porque nel so periodu de delegada del Gobiernu yá anuló les declaraciones y ordenances a favor de la oficialidá qu'impulsaron dellos Conceyos. Daquella, pa la númberu ún del PP, reconocer la igualdá de tolos asturianos yera dalgo que creaba “alarma social”. Sicasí, probibir l'usu del nuestru idioma, atacar la nuestra cultura, el nuestru patrimoniu y el llegáu de los nuestros mayores ye dalgo que-yos presta a los populares. Ta claro que pa ellos siempre habrá ciudadanos de primera y ciudadanos de segunda.

Amás, queda claro que los derechos civiles nun importen si valen pa xenerar polémica y esconder los casos de corrupción qu'afueguen a esti partíu. Lo importante ye asonsañar les actitúes de dalgunos compañeros n'otres comunidaes billingües, cuando la situación del asturianu n'Asturies nun tien nin puntu de comparanza, polo mísere y ruina.

Per otru llau, nun se pue dexar de llau l'actitú de la FSA, que, depués de votar a favor d'una proposición pa un plan de dignificación del asturianu -onde se diz literalmente que ye dificilmente xustificable que nuna sociedá democrática y avanzada se desprecie lo que representa la llingua asturiana-, acaba d'escaecer tolo alcordao pa dir de la mano de la derecha más rancia y intolerante. Por eso, la XDLA pide a los partíos políticos qu'apoyaron estes midíes que tomen nota y, amás de pidir una rectificación inmediata a los socialistes -convertíos nos principales validores de la política uniformadora y totalitaria de la derecha-, valoren el grau d'enfotu que tien la FSA pa posibles alcuerdos futuros. De la mesma manera, solicita un posicionamientu claru del Gobiernu asturianu y del presidente de la Xunta Xeneral contra esta actitú intolerante y intolerable pa col nuestru idioma, que lo que necesita agora ye protección y respetu y non prohibiciones y represión.