LA XDLA celebra’l pasu dau pola FSA nel camín hacia la oficialidá
El domingu foi un día de celebración pa los y les militantes socialistes qu’entienden que nun se pue defender una llingua ensin respetar los derechos de la xente que la fala: una propuesta de la militancia a favor de lluchar por una futura oficialidá de la llingua, defendida nes agrupaciones llocales, algamaba’l preste nel 32º congresu de la FSA-PSOE. La Xunta pola Defensa de la Llingua Asturiana compartió la celebración y felicitó a los protagonistes d’esi alcuerdu. Entendemos l’allegría de sentir que’l to partíu por fin pue ser parte de la única solución aceptable pal conflictu llingüísticu d’Asturies: el reconocimientu de la oficialidá del asturianu y del gallego-asturianu.
Foi un gran pasu pa la FSA, pero los y les falantes d’eses llingües siguen careciendo una inxusticia y adebeciendo pol día en que se pueda empezar a trabayar pa desaniciala. Falar agora de rescatar la Llei d’usu y promoción del asturianu nun ye aceptable, porque ye, yá lo denunciemos un cientu de veces, una llei vencida y superada pola realidá y pola normativa europea posterior. La oficialidá nun pue esperar y tien que venir a traviés d’una reforma del Estatutu d’Autonomía.
Les blimes tán ehí. El movimientu social a favor de la oficialidá yá-y punxo fecha a la modificación del Estatutu d’Autonomía. A les persones de la executiva nueva de la FSA-PSOE dámos-yos la bienllegada y convidámosles a apuntar la fecha na so axenda política y a xubir al proyectu 2018 pola Oficialidá, formando parte d’esa mayoría necesaria pal cambéu. Namás asina van dar satisfacción a esa demanda de les bases que llevaba años silenciada nel so partíu, que se punxo de manifiestu nel congresu la fin de selmana pasada y que comparten con una gran mayoría de la sociedá asturiana.
La Xunta pola Defensa de la Llingua Asturiana lleva dende febreru trabayando pa xuntar fuerces nesta xera. El Día de les Lletres anunciábemos la nuesa intención y el pasáu mes de setiembre presentábemos la campaña Proyectu 2018 pola Oficialidá. Lo que paecía utópico hai un par d’años tien agora, con esti cambéu de posición de la FSA, una posibilidá de facese realidá. Asturies lleva 40 años esperando ver llegar el tren de la historia. Hai que garralu, de xuru va nel bon sentíu y nun pasa tolos díes.
