La XDLA convoca los Premios Críticos de les Lletres Asturianes al despreciar l'Asociación d'Escritores, l'asturianu, na convocatoria d'anguaño.

La Xunta pola Defensa de la Llingua Asturiana (XDLA) llamenta fondamente la decisión final de l’Asociación d’Escritores d’Asturies de nun incluyir nos XIII Premios de la Crítica d’Asturies a los escritores en llingua asturiana. Esta asociación venía convocando dende l’añu 2003 delles categoríes pa les obres publicaes n’asturianu nel añu anterior a la convocatoria, pero esti añu namás se puen presentar a concursu les obres en castellanu. L’Asociación d’Escritores d’Asturies argumenta, ente otres cuestiones, la falta d’obres en llingua asturiana concurrentes a concursu, lo que pa nós nun ye más qu’una demostración d’inorancia o despreciu al bon facer de los y les escritores porque a lo llargo del 2011 publicáronse 141 obres n’asturianu, númberu bultable qu’echa embaxo cualquier argumentación sobre la escasez de producción lliteraria nel idioma autóctonu.

Otru argumentu del que se val esta Asociación pa escluir la obra n’asturianu ye la yá tan masuñada cuestión de la crisis ecónomica, cuando persabemos que les editoriales, instituciones y persones interesaes collaboraben cola asociación de manera que’l costu económicu de les categoríes d’asturianu venía siendo prácticamente inesistente. Dende la Xunta pola Defensa de la Llingua Asturiana paeznos que más bien lo qu’hai ye pocu o nengún interés en fomentar la lliteratura n’asturianu dende esta asociación: lo que s’escuende, daveres, ye una actitú prexuiciosa pa col idioma y qu’esti premiu valora más la forma (la llingua) que’l fondu (la calidá lliteraria).

Paeznos especialmente grave que sía l’Asociación d’Escritores d’Asturies la que discrimine la llingua asturiana cuando son sabedores de que nun se pue falar de lliteratura n’Asturies ensin incluir a los y les escritores na llingua propia. Cuando la lliteratura fecha n’asturianu tien reconocimientu internacional y destaca pola so calidá dientro del espectru románicu, nun podemos tolerar qu’una asociación que se diz d’escritores y d’Asturies practique unes actitúes acomplexaes más propies d’otres époques predemocrátiques.

Por too esto, dende esta organización, Xunta pola Defensa de la Llingua Asturiana, vémonos obligaos a convocar, de forma escepcional, los Premios Críticos de les Lletres Asturianes, que van reconocer en cuatro categoríes –lliteratura infantil y xuvenil, narrativa, poesía y ensayu– les obres publicaes a lo llargo del 2011 n’asturianu y gallego-asturianu. Un xuráu de persones espertes en caúna de les materies va ser l’encargáu d’otorgar estos Premios. La entrega de premios, a la que tais toos y toes convidaes, va facese’l vienres 30 de payares, a les 19:30 hores, na galería d’arte El Texu (c/ El Postigo Baxo 13, d’Uviéu).