La XDLA denuncia la intención de la dirección de RTPA de firmar un alcuerdu por valor de dos millones d'euros con Warner
posted by xdla
on Llu, 02/11/2015 - 19:36
El proyectu, que nun va xenerar nengún beneficiu pal audiovisual asturianu, demuestra la falta de compromisu llingüísticu de los xestores actuales
El director xeneral de RTPA, Antonio Virgili, ta a puntu de firmar un alcuerdu cola multinacional norteamerica Warner Bros Entertainment, Inc, una de les productores de cine, música y televisión más importantes del mundu. El contratu, con una duración de trés años y qu'espera'l preste de la Conseyería d'Economía, va permitir ver na TPA películes y series d'estrena de producción norteamericana. En total, esti alcuerdu audiovisual tien un costu de dos millones d'euros. Pa la Xunta pola Defensa de la Llingua Asturiana (XDLA) ye pergrave qu'esti alcuerdu salga alantre, porque supón consumir nun añu'l 10% del presupuestu que tien RTPA y va facelo en dalgo que nun va xenerar nengún beneficiu económicu nel nuestru territoriu. Son películes que se van emitir doblaes al castellanu con una sonorización yá fecha n'empreses de Madrid, polo que los xestores de la radiotelevisión pública vuelven incumplir la llexislación vixente y los mandaos de fortalecer el texíu audiovisual del país y fomentar l'usu del asturianu.
La firma d'esti alcuerdu, de llegar a producise, ye tovía más grave si se tien en cuenta qu'Antonio Virgili, el director actual de RTPA, ta desempeñando'l cargu en funciones, que los partíos parllamentarios tán en negociaciones pa nomar un xestor nuevu y que va tomase un determín económicamente tan importante pa la cadena ensin que'l Conseyu d'Alministración de la radiotelevisión pública tea operativu. Pa la XDLA, esta intención incapacita a la dirección actual de RTPA -incluyendo a Antonio Virgili y a Francisco Orejas- pa siguir nel cargu, porque l'alcuerdu contradiz, amás de lo que diz la Llei d'Usu y la mesma Llei de RTPA, l'espíritu del pactu d'investidura ente PSOE y IX, que diz que RTPA tien qu'aumentar los conteníos en llingua asturiana. Tamién va contra l'oxetivu del mesmu plan de dignificación del asturianu, aprobáu apocayá col consensu d'una parte importante del arcu parllamentariu y que, con unos términos menos esplícitos, vien a dicir lo mesmo. Volvemos insistir en que'l compromisu mínimu de cumplir cola llexislación tien que ser un motivu sine qua non pa dirixir RTPA. Pel momentu, tolos nomes que se punxeron enriba la mesa -y amás por formaciones qu'alcordaron facer medrar la presencia del idioma na cadena- nun cumplen con esti perfil.
Otra manera, ye mui chocante qu'esta inversión tan escomanada de dos millones d'euros, que guapamente se podría destinar a la producción propia y al doblaxe de dibuxos animaos -a xenerar beneficiu nel territoriu-, va destinase a cine de Hollywood. Dase la casualidá de que, dexando de llau los westerns, el cine norteamericanu nun suel pasar del 2% d'audiencia en TPA, tando perbaxo de la media de la cadena. Mentanto, el (pocu) cine dobláu al asturianu perpasó esi porcentaxe. Amás, la última producción n'asturianu estrenada en TPA -L'alzada- llegó a doblar la media d'audiencia. Sicasí, poco parecen importa-y a Virgili y compaña estos datos. Los xestores actuales muestren día tres día la so falta de compromisu col audiovisual y cola cultura asturiana, igual que la so incapacidá pa crear unos medios públicos fuertes y apegaos al territoriu, unos medios de los que tolos asturianos nos sintamos arguyosos.