La XDLA llama a la movilización pola oficialidá de les llingües d'Asturies
posted by xdla
on Sáb, 29/01/2022 - 12:01
Tamos viviendo una etapa fundamental nes negociaciones pa que los partíos favorables a la oficialidá alcuerden la reforma estatutaria que por fin reconoza los mesmos derechos a tola ciudadanía, fale la llingua que fale. Esti reconocimientu pudo facese muncho primero: na llexislatura anterior o va cuarenta años, pero nun hubo la valentía nin la responsabilidá política necesaries pa ponenos al altor de les demás comunidaes con llingües propies diferentes del castellanu.
Nun podemos perder más tiempu. El movimientu de reivindicación llingüística yá demostró munches veces na cai qu'esa reclamación ciudadana sigue tando ehi, ensin resolver depués de décades. Ye inaceptable que los partíos políticos asturianos entá nun atoparen el momentu pa poner remediu a esi déficit democráticu. Y esi momentu tien que ser agora.
Vamos arrodiar la Xunta Xeneral con una "O" d'oficialidá formada poles banderes qu'enllenaron les cais d'Uviéu nes últimes movilizaciones masives. Y vamos facelo pa recorda-yos a los nuestros diputaos y diputaes que los derechos de les persones falantes d'asturianu y de gallego-asturianu nun son aplazables o recortables. Querémoslos yá. Aquellos partíos que crean na igualdá y na ampliación de derechos tienen que llegar a un alcuerdu ensin más demoranza. Los que queden fuera d'esi alcuerdu o voten en contra van demostrar que tán nel llau de los qu'apuesten pola esclusión y la intolerencia.
Trai la bandera de la oficialidá y súmate a la defensa de los nuestros derechos.