La XDLA llama a los diputaos y diputaes escoyíos esti domingu a trabayar dende'l primer día pa llograr la mayoría pa reformar l'Estatutu

Dexémoslo claro nel nuesu mensaxe na manifestación pola oficialidá del sábadu que zarró la pasada selmana de les lletres. La Xunta pola Defensa de la Llingua Asturiana nun va orientar el votu de los y les sos simpatizantes nestes elecciones municipales y autonómiques como nun lo fexo n’anteriores ocasiones. Igual que lo importante de la música ta nel silenciu ente les notes, la política que nos interesa ye la que se faiga ente campañes electorales.
Esta vegada tamos sintiendo a dellos partíos que dicen tener un compromisu col respetu a les llingües y lleven nos sos programes propuestes de reforma del estatutu d’autonomía pa recoyer con diferentes fórmules la oficialidá del asturianu y del gallego-asturianu. Y esto vémoslo, y tien que velo’l movimientu de reivindicación llingüística, como un trunfu de tantos años de movilización, d’estudiu, de dignificación, de reivindicación y d’usu de les llingües… na música, nes artes escéniques, nel mundu audiovisual, na lliteratura, nos centros de trabayu y d’estudiu; en definitiva, na vida social. Ye un trunfu de toles y tolos que participamos d’esi movimientu imparable, y de muncha xente que tuvo y yá nun ta. Pero esa recompensa ye pequeña entá pa tantu esfuerzu colectivu.
Sía’l que sía’l resultáu de les elecciones del 28 de mayu, el mandáu va ser imperativu pa la Xunta Xeneral que se forme: hai qu’acabar yá cola discriminación llingüística, con esta situación d’anomalía democrática y constitucional que carecemos n’Asturies.
La única solución ye aprobar una redacción nueva del estatutu d’autonomía, siguiendo’l modelu de les seis comunidaes autónomes que yá reconocen la oficialidá de les llingües que se falen nos sos territorios. Ensin más aplazamientos, ensin condiciones y ensin recortes.
Y equí ta’l nuesu mensaxe pa los diputaos y diputaes que resulten escoyíos el domingu: nesta llexislatura hai que llograr l’alcuerdu de la mayoría suficiente de la cámara que’l propiu estatutu afita pa la so reforma. Nun val echar cuentes de votos ensin trabayar primero na construcción d’esi alcuerdu. Nun val escusase na sida d’un resultáu partidista pa nun ponese a trabayar dende’l primer periodu de sesiones de la llexislatura, dende l’otru día de constituise la cámara, na busca d’esa mayoría. Una mayoría que se tien que construir como pa toles lleis que s’aprobaron na Xunta Xeneral dende que nun hai mayoríes absolutes de nengún partíu. Una construcción que se pue impulsar dende cualquier partíu de la Xunta Xeneral, cola certeza de que la sociedá va tar apoyándola dende la cai como lleva faciéndolo dende va xeneraciones.
Nun vamos consentir que los diputaos y diputaes en contra d’un avance nel reconocimientu de los derechos llingüísticos sían quien a imponer a los demás, a la mayoría, y a tola población asturiano, la so idea d’una Asturies menos llibre, menos plural, menos tolerante y más atrasada. Esta vez va ganar l’Asturies que quier un futuru meyor. Esa ye la música que queremos sentir.