La XDLA reclama al Conceyu d'Avilés más visibilidá pa la llingua asturiana al traviés de les webs municipales y les sos redes sociales
La Xunta pola Defensa de la Llingua Asturiana (XDLA) quier mostrar la so esmolición pola presencia nula de la llingua asturiana dientro de la web nueva del Teatru Palacio Valdés, que s'estrenó esti xueves 31 d'ochobre coincidiendo col centenariu del coliséu avilesín. Una situación que manca más cuando'l mesmu teatru tien a les sos puertes un monumentu n'homenaxe al teatru n'asturianu.
Pa la organización, esti fechu muestra una falta de sensibilidá del gobiernu local, encabezáu por Mariví Montesín, hacia'l nuestru patrimoniu llingüísticu. L'asturianu tien una presencia namás qu'anecdótica nel día a día de la imaxe pública institucional de la tercer ciudá d'Asturies, como se pue comprobar visitando la web del Conceyu d'Avilés o les sos redes sociales.
Por eso, la Xunta pola Defensa de la Llingua reclama al Conceyu qu'igüe esta situación y ponga en marcha una versión n'asturianu na web nueva del Palacio Valdés, pero tamién de la mesma páxina del Conceyu y de les sos redes sociales. El Conceyu tien en funcionamientu un serviciu de normalización llingüística que bien se podría encargar d'estes cuestiones, como yá lo fai n'otres munches actividaes.
La organización quier solicitar tamién a los demás conceyos d'Asturies y otres instituciones públiques, tamién autonómiques, l'usu del asturianu nes webs y redes qu'utilicen pa presentase énte la ciudadanía. Nestos momentos, cuasi puen contase colos deos d'una mano les páxines d'entidaes públiques que cuenten cola opción de poder navegar n'asturianu o en gallego-asturianu, un fechu que consideramos una falta de respetu hacia'l patrimoniu llingüísticu d'esta tierra y hacia los sos falantes.
Pa iguar esta situación, la Xunta pola Defensa de la Llingua Asturiana va entamar nos díes vinientes una campaña pa facilitar a los ciudadanos que se puedan dirixir a les Alministraciones públiques pa reclamar l'usu del nuestru idioma nes sos redes sociales y páxines web.