La XDLA reclama a Cultura qu'ayude a llevar conteníos propios a les cases asturianes
posted by xdla
on Vie, 20/03/2020 - 11:35
La Xunta pola Defensa de la Llingua Asturiana (XDLA) reclama a la Conseyería de Cultura, Política Llingüística y Turismu que ponga en marcha iniciatives pa llevar la cultura asturiana a les cases toles asturianes y asturianos depués de que l'andanciu de Covid-19 supunxera'l zarru de tolos espacios escénicos y la cancelación de toles actividaes culturales programaes pel territoriu.
Asina, la organización pide a la cartera que dirixe Berta Piñán que ponga a disposición de tola xente interesao y al traviés de les redes lliteratura, música y producciones audiviosuales na nuestra llingua. Pa eso, podría cuntase cola collaboración d'editoriales, discográfiques, escritores, actores y músicos, amás de poner en marcha visites virtuales al patrimoniu asturianu.
Llectures, esposiciones, entrevistes a artistes, cine y audiovisuales, obres de teatru, documentos culturales y música, serviciu gratuitu d'empréstamu de llibros electrónicos, audilollibros y publicaciones al traviés d'Internet de manera gratuita y accesible 24 hores al día per móviles, tablets, ordenadores o llibros dixitales, puen ser nesti momentu l'arma principal pal entretenimientu de muncha xente.
Nesi sentíu, tien que xugar un papel fundamental una entidá como TPA, pa que reponga y ponga tamién online películes doblaes al asturianu, curtiumetraxes rodaos nesti idioma y, sobre manera, programación infantil na nuestra llingua, amás d'otros formatos disponibles nel archivu de la cadena. Nesi sentíu, hai que destacar l'alcuerdu ente'l Ministeriu d'Educación y RTVE o ente la Conseyería d'Educación catalana y TV3 pa impulsar los conteníos educativos pa la reciella, una iniciativa que tenía que copiase n'Asturies. Del mesmu mou, TVG amplió la programación infantil en gallegu hasta les 12 hores.
La crisis sanitaria pela que tamos pasando nun pue convertise nuna crisis cultural que dexe silente a la industria cultural nel nuestru idioma. La Conseyería de Cultura tien qu'encargase de la difusión del nuestru patrimoniu y ufiertar alternatives culturales y d'ociu n'asturianu a la población.
Plan de choque
Otra manera, la Xunta pola Defensa de la Llingua Asturiana reclama al Gobiernu autonómicu la puesta en marcha d'un plan estratéxicu y económicu pa la cultura asturiana qu'evite que l'andanciu del Covid-19 suponga l'esbarrumbe de tol sector. La industria cultural n'asturianu nun pue quedar fuera de les midíes económiques que se pongan en marcha dende les Alministraciones públiques.
Esti plan de coche tien que proponer midíes a un plazu curtiu, mediu y llargu pa caltener el sector. Hai que tener en cuenta que munchos de los sos profesionales son autónomos que vieron cancelaos espectáculos y actuaciones, y que perdieron tola facturación, ensin saber tovía cuánto van siguir nesta situación o si van a poder recuperala nel futuru.
Nestos momentos, la XDLA quier recordar a toles asturianos y asturianos la necesidá de que sigan toles recomendaciones de les autoridaes sanitaries y queden en casa como un actu de responsabilidá individual y colectiva. Frenar el Covid-19 depende de nós. #QuedaEnCasa.