La XDLA y Xeira entamen una campaña pa reclamar a los Conceyos l'usu del asturianu y del gallego-asturianu

La Xunta pola Defensa de la Llingua Asturiana (XDLA) y l'asociación del Navia-Eo Xeira entamen una campaña conxunta pa facilitar a la ciudadanía que se pueda dirixir al so Conceyu pa reclamar l'usu del asturianu y del gallego-asturianu. La campaña tien el lema global de 'Nel mio conceyu, na mio llingua' ('Nel meu conceyo, na mía llingua').

Los Conceyos son l’alministración más allegada a la ciudadanía y por eso puen cumplir un papel fundamental na defensa, recuperación y normalización de les llingües minorizaes. Así que les dos organizaciones ufren a les persones interesaes un modelu de solicitú onde se reclama un compromisu y implicación mayor de los Conceyu con esta cuestión.

Ente les midíes que se quier reclamar ta la traducción de la páxina web del Conceyu, la señalización d’edificios y dependencies del Conceyu, la oficialización de la toponimia tradicional o, nel so casu, la xeneralización del usu d'esa toponimia y l'usu de la llingua propia nes intervenciones públiques de l’alcaldía y les conceyalíes, amás de na cartelería y difusión de campañes y actividaes.

Nestos momentos, cuasi puen contase colos deos d'una mano les páxines d'entidaes locales que cuenten cola opción de poder navegar n'asturianu o en gallego-asturianu, un fechu que consideramos una falta de respetu hacia'l patrimoniu llingüísticu d'esta tierra y hacia los sos falantes. Lo mesmo pasa cola toponimia oficial o na visibilidá de les llingües propies en campañes y nel día a día de l'Alministración local.