La Xunta denuncia’l despreciu al asturianu nos presupuestos de Cultura n’Uviéu
posted by xdla
on Vie, 22/11/2019 - 18:33
El determín de PP y Ciudadanos d’amortizar la plaza de coordinador en Llingua Asturiana na ufierta pública d’empleu del Conceyu d’Uviéu y de quitar la subvención prevista a l’Academia de la Llingua Asturiana ye una demostración de qué clas de política llingüística quieren facer los partíos de la derecha: la del despreciu más absolutu, la de nun gastar un euru nello.
A la manera de Mariano Rajoy, que nun anulaba la Llei de Memoria Histórica, pero que nun ponía nin un céntimu pa dotala de recursos, la derecha provinciana d’Asturies presenta toa enchipada los sos presupuestos de Cultura inorando dafechu l’asturianu, anque pa los poderes públicos haya una obligación por llei de velar por esi patrimoniu cultural.
¿Daquién pue figurase al Partíu Popular y a Ciudadanos poniéndose d’alcuerdu pa eliminar cualquier tipu d’ayuda al gallegu na capital de Galicia? Eso n’Asturies ye posible. La incultura y l’autoodiu de la derecha local fai posible eso y muncho más.
Puen subvencionase les orquestes, la zarzuela, la ópera, el cine, el teatru, la poesía, la cerámica —bien fecho—, pero destinar recursos pa la única realidá cultural propia y diferencial d’Asturies, pa la que ye menester polítiques decidíes d’apoyu... non, pa eso non.
Estos xestores culturales zarren los güeyos a les potencialidaes que tien la normalización de la llingua asturiana pa xenerar puestos de trabayu, pa facer posible una marca de diferenciación turística. Too eso nun-yos da más porque tán cegaos polos sos prexuicios ideolóxicos. Pero, eso sí, van dicinos qu’ellos tán a favor del asturianu, qu’ellos quiérenlo muncho..., pero que s’arregle solo.
¿Pa cuándo una derecha que nun desprecie l’asturianu, que defenda los sos postulaos políticos ensin arrenegar de la llingua del país? De momentu, nun la tenemos y n’Uviéu ta la prueba.