La Xunta pola Defensa de la Llingua llogra’l Premiu Timón de Cultura Asturiana
La Xunta pola Defensa de la llingua Asturiana ye la ganadora del II Premiu Timón de cultura Asturiana convocáu por L'Arribada p’asociaciones, sociedaes y fundaciones con sé n’Asturies, que tengan como fin la conservación y promoción de la identidá cultural del país y qu’empleguen la llingua asturiana nes sos actividaes, según alcuerdu d’un xuráu aconceyáu güei en Xixón y formáu por José Rogelio Álvarez Hevia, Xicu Xabel Díaz Yepes, Daniel García de la Cuesta, Aurora García Rivas y presidíu por Humberto Gonzali.
Nesta edición taben nominaos, amás de la entidá ganadora, Sociedad Humanitarios de San Martín, Fundación Belenos, Asociación Cultural San Tirso del Eo y Sociedad Popular y Cultural La Regalina.
El xuráu quier destacar el trabayu de l’asociación premiada na defensa de la llingua asturiana y de los derechos llingüísticos de los ciudadanos d’Asturies. Dende 1984 la Xunta pola Defensa de la Llingua Asturiana vien entamando de continuo múltiples iniciatives, empobinaes a la dignificación del asturianu y a la so normalización social nes alministraciones públiques, na enseñanza, nos medios de comunicación, na empresa privada y n’otros munchos ámbitos de la nuesa sociedá.
El gallardón del II Premiu Timón de Cultura Asturiana, consistente nuna obra del escultor y ceramista xixonés Jesus Castañón, entregaráse’l 27 de setiembre mientres la cellebración de La Vagamar 2014.
(TESTU DE www.arribada.wordpress.com)