L'Arcu Atlánticu censura una charla de la XDLA
Esti añu, el Conceyu de Xixón abrió una convocatoria p'asociaciones culturales pa la realización d'actividaes dientro del Festival Arcu Atlánticu 2017. La Xunta pola Defensa de la Llingua Asturiana (XDLA) solicitó esti espaciu pa presentar nuna charla'l Proyectu 2018, una iniciativa pa poner en marcha una reforma estatutaria al traviés del Artículu 56.1., y pa colocar un puestu con material nel que tamién s'esplicara'l trabayu de la organización.
Sicasí, la Fundación Municipal de Cultura, Educación y Universidá Popular de Xixón denegó'l permisu pa la primer actividá por considerar que "nun encaxa bien cola filosofía del Arcu Atlánticu; ye una visión del fechu llingüísticu mui venceyada a la política que desdibuxa la idea del Festival na que venimos trabayando dende la primer edición".
Los responsables de la política cultural de la mayor ciudá d'Asturies afirmen qu'abrieron l'Arcu Atlánticu a les asociaciones, pero que ye una midida cultural. "Trátase de poner en valor la cultura y la llingua asturianes (lo mesmo que les d'otros territorios atlánticos), de la forma más oxetiva y neutral posible", señalen. Asina, espliquen que lo que se pretende ye mostrar la situación del asturianu dende un puntu de vista más divulgativu, "un poco más alloñáu de la vindicación nel sentíu estrictu".
La Fundación Municipal de Cultura afirma que, si queremos participar nel Arcu Atlánticu, tenemos que planteala dende una posición "más abierta, más plural y, a fin de cuentes, pa que tea más al rodiu del calter cultural del eventu, pensáu tanto pa xixoneses como pal públicu visitante". Otra manera, acepten la segunda actividá, pero añaden que "nun pue valir como implementación del conteníu meramente políticu de la primera".
Pa la XDLA ye intolerable que dende una institución pública como la Fundación Municipal de Cultura se censure y se vete a asociaciones, reflexando prexuicios y sesgos políticos represores. Y ye que la politización ye la de los organizadores, que non solo quieren tapecer la realidá na que sobrevive la llingua asturiana (a xixoneses y foraneos) sinón que tienen el valor de pidir a una organización social que modifique una presentación.
Por too esto, la XDLA nun va participar nun festival que pretende poner en valir el patrimoniu cultural européu al traviés d'una escenificación vacia y ridícula. Vamos pidir responsabilidaes y el cese de los responsables que pretenden censurar y poner filtru a una entidá que lleva más de 30 años lluchando na cai pola oficialidá de la llingua asturiana, ensin más aditivos nin xuegos florales. Un sitiu, la cai, onde vamos siguir tando por muncho que-y cafie al Conceyu de Xixón, reivindicando qu'Asturies sía, sí, más abierta y más plural.