Moisés Cima Fernández ye’l ganador del concursu lliterariu «Amor pola Llingua»
La edición d'esti añu contó con un númberu altu de participantes y, añu tres añu, tamos viendo cómo l'apegu idiomáticu crece ente los falantes más mozos. Si bien cada edición nueva del concursu va ganando más participantes, nesta cuarta edición disparóse la cifra y lleguemos a 68 concursantes con un total de 132 eslóganes, poemes, declaraciones y sentires.
El día internacional de la Llingua Materna foi declaráu pola UNESCO nel añu 2000 como reconocimientu a los mozos muertos nuna manifestación en defensa de los derechos llingüísticos del bengalí, en Dhaka (Bangladés) nel añu 1952. Dende Xunta Moza nun podemos más que sentinos identificaos cola mocedá falante de la llingua bengalí y con toles comunidaes onde hai llingües minoritaries en situación de subordinación. Por eso queremos aprovechar esti día pa recordar la necesidá de preservar toles llingües, independientemente del so númberu de falantes, y remarcar la importancia de les mesmes nel patrimoniu común de la humanidá.
Asina les coses, Xunta Moza sumóse a la celebración internacional convocando esti concursu d'amor al idioma maternu, que nun ye otra cosa que la denuncia de buena parte de la mocedá asturiano de la situación de desamparu na que s'atopa cuando quier facer una vida «normal» n’asturianu. Pa ello, celebróse un conciertu de punk-rock n'asturianu col grupu moscón Misiva, acabante de presentar el so segundu discu de llarga duración Gran Mentira, nel CSOA La Madreña d’Uviéu, el pasáu vienres 22 de febreru. Amás de l’actuación de Misiva, nel actu diose a conocer la persona ganadora de la cuarta edición del concursu «Amor pola Llingua» que cayó, nesta ocasión, en Moisés Cima Fernández pola frase:
Métime la llingua hasta'l gargüelu
déxame sentir les tos palabres bien dientro de mi
, al que se-y fizo entrega d’un llote de llibros y de dellos materiales de la organización (camisetes, discos, etc.), amás de ser susceptible d’usa l’eslogan ganador en campañes futures de la organización.