Nenguna meyora pal asturianu nel proyectu de presupuestos
La cantidá pa política llingüística ye mísere, mentes que regalen 70.000 euros al director de RTPA, Antonio Virgili, que se niega a cumplir colo que diz la Llei d'Usu
El proyectu de presupuestos xenerales del Principáu d'Asturies pal 2019, dientro de la partida de la Conseyería d'Educación y Cultura, acuta 70.000 euros pa la promoción del asturianu en RTPA. Pa la Xunta pola Defensa de la Llingua Asturiana (XDLA), qu'una partida del presupuestu curtiu y mísere que dedica'l Gobiernu d'Asturies a la normalización del nuestru idioma (0,04 % de toles cuentes) vaiga pa la radiotelevisión pública, que yá va recibir 23 millones d'euros al traviés de la Conseyería de Presidencia, ye dir contra l'Estatutu, la Llei d'Usu y la mesma llei de creación de RTPA, normes qu'establecen que los medios públicos tienen que ser una parte activa nel procesu de recuperación del patrimoniu llingüísticu del país.
Dar perres a una cadena pública pa qu'emita n'asturianu ye actuar como si ésta se tratara d'un mediu priváu: ye dar por fechu que TPA y RPA son cadenes en castellanu y que pa facer daqué n'asturianu hai que poner dineru dende fuera. Too esto ye más llamentable cuando nos presupuestos, na memoria d'oxetivos de RTPA pal 2018, nun hai nenguna referencia a la promoción del asturianu y namás se recueye nun puntu que la radio pública asturiana “divulga la llingua asturiana”.
Hai que recordar qu'actualmente namás s'emiten en RPA 10 minutos n'asturianu de llunes a vienres. Pareznos que calificar esto de "divulgar l'asturianu" ye una burlla y un insultu a la intelixencia, porque hai emisores privaes que-y tán dedicando más tiempu a los espacios nesta llingua. Nun pue ser que Virgili y el so equipu, qu'incumplen la llei y dirixen la radiotelevisión pública como'l so güertu particular, reciban el premiu de 70.000 euros estra.
Pa da-y sentíu a esa partida, la XDLA solicita a la Conseyería d'Educación y Cultura que firme un conveniu de collaboración cola TPA pa la creación del Serviciu Asturianu de Doblaxe, una entidá encargada de coordinar los doblaxes y supervisar los trabayos –de los que se van encargar empreses privaes-, amás d’avalar el modelu llingüísticu de los mesmos –que tien que cuidase con tol procuru-.
Partida irrisoria y insuficiente
Otra manera, la Xunta pola Defensa de la Llingua quier denunciar que la partida total del presupuestu dedicáu a la promoción del asturianu ye irrisoria y insuficiente, al ser la Dirección Xeneral de Planificación Llingüística y Normalización el departamentu con menos presupuestu de tola Administración autonómica. Con acciones asina podemos ver que, a pesar de lo aprobao nel XXXII Congresu de la FSA, nin tenemos oficialidá nin muncho menos se cumple cola Llei d'Usu, que ye lo que dicíen los socialistes que diben facer hasta poder modificar l'Estatutu. Tamos viendo cada día que nin lo uno nin lo otro. Na probitú presupuestaria pal asturianu nun se ven diferencies ente la FSA nueva y la vieya.