XXXIV Premios Andrés Solar.

La Xunta pola Defensa la Llingua Asturiana anuncia los ganadores de los Premios Andrés Solar na so XXXIV edición. Nesta ocasión, el Pegollu foi pa D. Santiago García Granda, Ilmu. Rector Magníficu de la Universidá d’Uviéu. El Madreñazu foi pal discursu del odiu y negacionista de Pablo Casado, cabezaleru del Partíu Popular.

Los Premios Andrés Solar algamen nesti 2018 la XXXIV edición. Nos sos trenta y trés años de trayectoria, los premios tienen una vertiente doble: per un llau, la Xunta premia una entidá o persona que rescamplara pol so llabor en defensa o promoción del asturianu: esti reconocimientu materialízase nel Pegollu. Pero los Premios Andrés Solar tienen tamién una versión negativa, que reconoz a la persona o entidá que rescamplara pol so llabor negativu pa cola llingua asturiana. Esti dudosu honor represéntase con un “Madreñazu”.

El Pegollu d’esti añu 2018 quier reconocer el llabor de D. Santiago García Granda, Ilmu. Rector Magníficu de la Universidá d’Uviéu pol llabor que vienen llevando alantre na normalización del asturianu na máxima institución educativa, investigadora y científica d’Asturies. Por too esto, ye mui bonmerecedor d'esti premiu.

El “Madreñazu” nesta edición va pal discursu del odiu y negacionista xenófobu de Pablo Casado, cabezaleru de la organización política PP, que nos últimos tiempos vien faciendo declaraciones desinformaes y malintencionaes sobre l'asturianu. Por too esto, la Xunta pola Defensa de la Llingua Asturiana considéralu bon merecedor del antipremiu.

La entrega de los Premios va facese’l día vienres 21 d’avientu a les 19:00 hores nel Antiguu Institutu de Xixón. L’actu va contar cola actuación musical d’Antón Menchaca.

Tamién, como tolos años, depués del actu va haber una espicha nel Antiguu Institutu mesmu.