XXXVIII PREMIOS ANDRÉS SOLAR
L’añu que vien, la Xunta pola Defensa de la Llingua Asturiana fai cuarenta años. Ye muncha historia pa una organización ciudadana basada nel trabayu voluntariu y militante. Por desgracia, nesos cuarenta años de camín fomos perdiendo a compañeros y compañeres. El primeru, Andrés Solar.
Precisamente, tamos equí pa celebrar la última edición de los premios que llevaron el so nome y que se crearon pa recordalu. Foi él, a títulu póstumu, quien recibió’l primer pegollu, en 1985. D’entós p’acá, pasaron 37 ediciones nes que tentemos de siguir la regla non escrita de nun premiar a los que tábemos implicaos directamente na reivindicación llingüística. Ye verdá que non siempre fomos quién a ello porque hubo años duros (sábenlo bien los más vieyos) en que nun había muncho onde premiar.
Foron 37 ediciones nes que nunca faltó la familia d’Andrés. Y cuando la pandemia, fomos hasta Deva a da-yos el premiu precisamente a ellos. Lali y Jesús, añu tres d’añu, siempre ehí.
Sabéis de sobra que los tiempos y les circunstancies sociollingüístiques foron cambiando adulces. Los enemigos siguen siendo poderosos y mediáticos, pero, más allá de sobreactuaciones de señoritos d’estrema derecha, yá nun ye políticamente correcto despreciar l’asturianu. Empezaba a resultanos fadio siguir falando d’ellos cuando nos víemos nos Andrés Solar, así que cuando lu dimos a la familia aprovechemos pa dexar de dar el madreñazu, el premiu malu.
Nestes últimes décades, a partir de la figura d’Andrés Solar hubo homenaxes, ediciones póstumes, Selmanes de les Lletres, discos y, dende hai dos años, un premiu lliterariu instituyíu pol Conceyu de Xixón que lleva’l so nome. Les empreses qu’usen l’asturianu son cada vez más y yá ta anunciada la creación d’un distintivu institucional, Alfaya, pa reconoceles públicamente. Llevábemos un tiempu dándo-y vueltes a la idea de zarrar el ciclu d’estos premios. Paeciónos qu’anguaño yera’l momentu.
Recordaba a lo primero que nos foren dexando compañeros y compañeres militantes; Andrés el primeru. Pero depués dexónos Xesús, n’Uviéu, y Yolanda, equí en Xixón. Y va bien poco, tamién equí, Xuan. Si Andrés, de la primer fornada de militantes, abrió los premios, qué meyor que zarralos premiando simbólicamente col pegollu a tola xente que foi militante en dalgún momentu de la historia, llarga, de la Xunta.
Ta claro que nun tamos equí tolos que somos o fomos de la Xunta, pero tola xente que tamos echemos dacuando un gabitu, más grande o más pequeñu, pa llevantar esta organización. Unes persones tuveron más tiempu qu’otres, unes nos primeros años y otres nos actuales. Unes diseñando cartelos, otres apegándolos. Unes apurriendo idees y propuestes, y otres iguándoles y llevándoles a la práctica. Unes faciendo pancartes y otres llevándoles nes manifestaciones... Les más de les veces, faciéndolo too, pa qué nos vamos engañar. Qué vos voi cuntar que nun sepáis. En fin: qu’esti premiu ye un reconocimientu a tola xente de la Xunta, porque tol mundu foi y sigue siendo necesariu pa que la reivindicación siga viva.
Los enemigos de la sobrevivencia del nuestru idioma son pocos, pero tienen tol poder: tán nos conseyos d’alministración de los medios de comunicación, nel llamáu aparatu d’estáu, nes oligarquíes financieres y, hasta ayeri, nes cúpules de los partíos mayoritarios. Sí, hasta ayeri porque nos últimos años ganemos pa la causa de la oficialidá al PSOE. Nun nos pue cayer embaxo que nestos años non solo dimos el madreñazu a Rozada y a Ovidio Sánchez, del PP. Tamién a Vicente Álvarez Areces, a Jose Luis Iglesias Riopedre y a Javier Fernández Vallina, responsables destacadísimos del PSOE. Ye bultable cómo cambió de postura esti partíu, pero tamién ye exemplu claru de la incidencia na sociedá de la reivindicación sostenida un añu tres d’otru pol movimientu de recuperación y normalización de la llingua asturiana.
Sí, los avances y los derechos nun vienen solos, nun caen d’un ñeru pega. Pa que’l pesu social del asturianu medrara, fixeron falta escritores, maestros y maestres, músicos y músiques, periodistes, empresarios, pero tamién tola ciudadanía, caún y caúna de nós falándolo, escribiéndolo. Y la espresión social de too eso precisa estructures organizatives que propongan, que denuncien, que faigan acciones reivindicatives pa que se llogren los derechos llingüísticos, pa que se llogre esa oficialidá que ye pasu necesariu pero que nun ye abondo pa garantizar la so sobrevivencia. Cantar n’asturianu, escribir n’asturianu o enseñar l’asturianu ye perimportante, pero cambiar el marcu xurídicu de la llingua precisa d’acciones sociopolítiques que presionen nesa dirección p’algamalo.
La reivindicación nun se sofita nel aire, necesita un movimientu que les fomente y les caltenga un añu tres d’otru, necesita organizaciones estables al traviés del tiempu que nun se casen con naide. La Xunta lleva camín de cuarenta años faciéndolo.
Nun somos un ente abstractu, somos persones voluntaries que nos ponemos d’alcuerdu nun trabayu y pal tiempu que seya y al nivel que cáun y caúna pueda y quiera. Eses persones necesaries pa que la organización siga llamámosles activistes o militantes. A esa militancia damos esti postrer premiu Andrés Solar.
Non por eso vamos escaecer a Andrés porque’l so recuerdu, anque munchos y munches nun lu conociéremos, sigue en cada actu militante que faigamos, en cada actividá, en cada denuncia, en cada manifestación pola oficialidá... como la del Día de les Lletres, el sábadu 6 de mayu. Porque sabemos que nada ta ganao na llei y que nada se va ganar si primero nun lo ganamos na cai. Por eso siguimos onde tamos y por eso la llucha y la reivindicación siguen.
Munches gracies a toes y a toos.
