De siguío, trescribimos el comunicáu de la Cooperativa El Nocéu nel que se denuncia la discriminación pol usar l'asturianu nos trámites cola Tesorería Xeneral de la Seguridá Social. Dende la Xunta pola Defensa de la Llingua Asturiana ufiertámos-yos tol nuestru apoyu pa iguar esta situación. Del mesmu xeitu, aprovechamos pa reclamar una vez más la oficialidá, como única manera d'asegurar un mínimu respetu a los derechos de les persones falantes d'asturianu.
Comunicáu de discriminación llingüística d’El Nocéu
Dende la Cooperativa El Nocéu queremos denunciar públicamente la situación de discriminación llingüística que sufrimos énte la Tesorería Xeneral de la Seguridá Social, dependiente del Ministeriu de Trabayu y Seguridá Social, al nun ser almitíos los nuestros estatutos por tar redactaos n’asturianu, siendo obligaes a presentalos en castellanu.
Al intentar danos d’alta como trabayadores de la cooperativa, atopámonos cola imposibilidá de facer cualesquier xestión cola almistración estatal na nuestra llingua propia, empleando na so argumentación l’artículu 4 del capítulu II de la Llei d’Usu y Promoción del Asturianu nel que se llimita l’usu d’esti idioma a l’alministración autonómica.
Nuna segunda instancia, na qu’una trabayadora d’esti organismu debía recurrir a los estatutos pa resolver una cuestión llaboral, ésta nun quixo nin garralos pol fechu de tar escritos n’asturianu.
Ye por esto que demandamos que se revierta esta situación de discriminación continua. Les persones qu’optamos por usar el nuestru idioma a la hora d’espresanos, de forma oral o escrita, nun podemos siguir marxinaes d’esta forma tan inxusta. Queremos dexar de ser persones de segunda a los güeyos de los poderes que siguen reprimiéndonos una y otra vez, cuando lo únicu que pidimos ye que se respeten los nuestros derechos básicos, la llibertá de poder espresanos na nuestra llingua.
Asina ye que l’únicu marcu que puede garantizar los derechos llingüísticos básicos de les persones asturfalantes ye la oficialidá del asturianu.
Sariegu, llunes, 14 de setiembre del 2015.
Cooperativa El Nocéu
