La XDLA pide a PSOE y PP qu'introduzan na Llei la normalización llingüística como otra de les misiones del serviciu públicu de RTPA. Foru Asturies y Izquierda Xunida yá enmendaron p'algamar esi oxetivu.
La Xunta pola Defensa de la Llingua Asturiana (XDLA) pide a tolos partíos con representación parllamentaria qu’afiten a la RTPA como ferramienta de normalización social del asturianu na Llei nueva que se ta preparando. Depués de la superación esti vienres 13 de xunu del Plenu de Totalidá colos votos de PSOE, PP ya IU, la organización cívica quier dirixise sobre too a socialistes y populares, porque Foru Asturies y Izquierda Xunida yá presentaron enmiendes qu'introducíen la normalización llingüística como una de les misiones del serviciu públicu de radio y televisión d'Asturies.
