Depués de qu'IX anunciara'l so apoyu al PSOE pa la investidura de Javier Fernández, la Xunta pola Defensa de la Llingua Asturiana (XDLA) califica de continuista les referencies a la política llingüística -por llamalo de dalguna manera- que recueyen los medios de comunicación. Y ye que, a la espera de saber si hai dalguna midida concreta, nel alcuerdu namás hai referencies a les discrepancies ente les dos formaciones sobre la oficialidá del asturianu. Parez qu'intenten vendenos el desalcuerdu como una midida o que nos demás puntos hubo un consensu xeneralizáu y que namás foi nesa cuestión onde surdieron les rocees. Sobre manera, ye especialmente llamativo qu'una de les fuercies firmantes d'esti alcuerdu asegurara na campaña electoral que la oficialidá yera una prioridá.
Sicasí, otra vuelta volvieron dexala pa prau na mesa de negociaciones. Parez que nun s'esixó a la FSA un derechu humanu como ye la igualdá de derechos llingüísticos, cuestión que vien xenerando una movilización civil constante dende los tiempos de la Transición y que sigue ensin resolver. Pa negar la oficialidá agora pónense sides como la falta de consensu o, mesmamente -utilizando un argumentariu mui de la FSA-, fálase de que quien lo reclama ye una minoria. Nun vemos mayoríes nin manifestaciones multitudinaries a favor de la reforma de la llei electoral, midida qu'a pesar de la negativa inicial socialista sí s'inclúi nel alcuerdu.
Ye mui preocupante la falta de midíes concretes en política lingüística, polo que se ta dando una fueya en blanco al Executivu de Javier Fernández pa que siga cola paralización total qu'hubo na llexislatura pasada. Mesmamente, fálase de la creación d'una d'eses famoses comisiones d'estudiu, d'esta vuelta pa estudiar les fórmules meyores pa protexer l'asturianu. Pa eso nun faen falta comisiones d'estudiu porque les fórmules yá les conocemos. Lo que fai falta ye firmar midíes concretes en materia política llingüística efectiva, pero nel alcuerdu nun se fala d'activar esta materia y d'implicase con ella. Tampoco nun se fala de mínimos que tendríen que tar en marcha dende hai más d'una década, como l'usu de la toponimia en toles estayes alministratives -mesmamente, na RTPA-. Asina, queda comprobao que vamos tener un Executivu formáu por un sector que quier acabar col nuestru patrimoniu llingüísticu (PSOE) y apoyáu por una fuercia política que nun aprovecha'l so pesu pa marcar l'axenda de la política llingüística. Y ye que si nun hai nada firmao ye que nun hai nengún compromisu nesa materia, polo que tenemos mieu de que too siga igual que siempre: parálisis y retrocesu.
