Proyectu 2018: siguen los contactos pa la reforma del Estatutu.

Esti alcuentru pue considerase un convite a formar parte del Proyectu 2018 pola Oficialidá que tamos impulsando dende va meses y que yá cuenta col apoyu d’otres formaciones na Xunta Xeneral, y que consiste na propuesta d’una reforma del Estatutu d’Autonomía pa incluir un artículu 4 cola oficialidá del asturianu y del gallego-asturianu.

Na reunión tratamos la coxuntura actual pa esa reforma. La nuestra postura ye que tien qu’abordase yá y qu’hai tiempu pa sometela a la consideración de la cámara nesti cursu políticu que ta entamando. Nun yé ético posponer el reconocimientu d’un derechu cuando tán ehí les condiciones pa facelu efectivu.

Per otra parte espunximos el poco recorríu que-y queda ya a la Llei d’Usu y Promoción del Bable/Asturianu, agotada pasaos venti años dende la so aprobación, superada pola normativa europea, y ineficaz nuna realidá pa la que nun taba diseñada: creación de la RTPA, apaición de medios nuevos de comunicación, aprobación de la LOMCE…

Por últimu animamos a la executiva nueva de la FSA a aprovechar el bon clima de collaboración ente grupu parllamentariu y partíu, y la llealtá que prometieron dende’l grupu al secretariu xeneral pa facer valir el mandáu del congresu y apoyar yá la oficialidá cuando s’abra na primavera la reforma del estatutu.