La XDLA recuerda al Gobiernu asturianu que la llingua propia ye l'elementu meyor pa mostrar cercanía y apegu a lo propio.
posted by xdla
on Xue, 14/05/2020 - 10:30
La Xunta pola Defensa de la Llingua Asturiana ve con esmolición que tanto'l Gobiernu asturianu como’l Conseyu Regulador DOP Sidra d'Asturies dexaron de llau la llingua asturiana en dos campañes importantes.
Asina, el Gobiernu asturianu punxo en marcha una campaña pa promover el consumu nel comerciu local onde'l nuestru idioma nun tien nenguna presencia. Pa la XDLA ye una estratexa enquivocada defender lo local, lo de casa, ensin tener presente la realidá llingüística que-y val de vehículu pa espresase. Nun tien sentíu que la llingua asturiana nun tenga un papel protagonista nesta campaña.
Otra manera, el Conseyu Regulador de la DOP entamó una campaña p'adaptar el consumu de sidra a la situacion sanitaria, con 40.000 vasos pal usu personalizáu con mensaxes que namás tán en castellanu. Ye esmolecedor que la DOP dexe siempre de llau'l nuestru idioma, cuando precisamente'l vocabulariu tradicional de la sidra ye n'asturianu. Amás, l'usu de la llingua propia ye la manera meyor de marcar la diferencia y la calidá dientro d'un contestu global.
La organización ve con sorpresa cómo'l Gobiernu asturianu mantién en cuarentena a la llingua asturiana y, depués d'un añu de les elecciones autonómiques, vemos que poco cambió. Namás hai palabres guapes y xuegos florales en redes sociales, pero eso nun val pa salvar un idioma en peligru de desapaición. Ye la hora de los fechos: la llingua asturiana tien que formar parte del procesu de reconstrucción social y económicu que se ponga en marcha y estes campañes dexen ver que’l Gobiernu d’Adrián Barbón nun tien esa intención.