El Conceyu d'Uviéu escuende y obliga a incumplir la llegalidá toponímica.
posted by xdla
on Vie, 25/12/2020 - 17:40
El Conceyu d’Uviéu presenta güei la rotulación nueva de los vehículos de llimpieza y recoyida de residuos, que promocionen el Camín Primitivu de Santiago cola marca “Oviedo, origen del Camino”.
La corporación anterior dio los pasos pa que s’aprobara la toponimia tradicional y, en consecuencia, cumpliendo la llegalidá, rotuláronse dellos vehículos municipales col topónimu oficial de la ciudá, Oviedo/Uviéu, n’aplicación del decretu 14/2019, de 13 de marzu (Gobiernu d’Asturies; BOPA 21-3-2019). La corporación nueva desprecia la llegalidá y vuelve a usar la denominación anterior, "Oviedo", ensin respetar la forma asturiana.
Lo mesmo fexo yá la Conceyalía de Deportes, que nes bases pa subvenciones excluye la posibilidá de que los equipos lleven na camiseta'l topónimu "Uviéu", dalgo que podía facese hasta agora. Nelles namás apaez la forma "Oviedo".
Esta clas de xestos de normalización toponímica —amás de cumplir cola llegalidá— yera lo mínimo que podíemos esixi-y a un gobiernu municipal que ta demostrando cada día la perceguera que-y da cualesquier cosa que güela a asturianu. Son dos exemplos más, de munchos, d’una política llingüística que, más qu’inexistente, ye belixerante contra l’asturianu, negándolo y invisibilizándolo.