Oficialidá, una reforma necesaria y urxente

Énte la sentencia del Tribunal Constitucional a favor del usu de la llingua asturiana na Xunta Xeneral y en contra del recursu presentáu pola ultraderecha, la Xunta pola Defensa de la Llingua Asturiana felicita a los grupos parllamentarios que sacaron alantre el nuevu reglamentu. Lo qu’hasta agora yera namás una concesión, agora yá ye un derechu consolidáu.                              

Demuéstrase una vuelta más que la reivindicación llingüística llogra oxetivos siempre que s’exerza de manera activa, confrontando con quienes quieren marxinar o incluso prohibir l’usu de la llingua asturiana. A vegaes, como nesti casu, son precisamente les resistencies de la parte más reaccionaria les qu’acaben afitando derechos.

Encamentamos a los diputaos y diputaes na Xunta Xeneral y a los conseyeros y conseyeres del Gobiernu asturianu a facer usu activu d’esi derechu. A falar n’asturianu y gallegu-asturianu. Son les élites polítiques, culturales y económiques les que pueden exercer el meyor papel normalizador y dignificador que requier el nuestru patrimoniu llingüísticu.

Sicasí, esti pasu alantre fai tamién rescamplar que lo esencial ta tovía por facer. De puertes pa fuera del palaciu de la Xunta Xeneral, los derechos llingüísticos siguen igual d’arrequexaos y marxinaos que taben ayeri.

Ye necesario estender derechos a tola ciudadanía. Ye necesario modificar l’Estatutu d’Autonomía, y reconocer al asturianu y al gallegu-asturianu como llingües oficiales y con ello, el derechu a usales a tolos asturianos y asturianes.