NUN NOS VAN CALLAR
posted by xdla
on Mié, 16/02/2022 - 17:05
La selmana pasada, cuatro persones de la Xunta pola Defensa de la Llingua Asturiana (XDLA) recibíen nes sos cases una notificación del Conceyu d'Uviéu comunicándo-yos la imposición d'una multa por infracción de la Ordenanza de Llimpieza. El "delitu" foi apegar cartelos en sitios non autorizaos p'anunciar la manifestación pola oficialidá del 16 d'ochobre del añu pasáu. Esa ye la trampa del sistema pa los movimientos sociales: namás pues apegar cartelos en sitios autorizaos... pero nun tenemos sitios autorizaos p'apegar cartelos, así que ye meyor que nun anuncies nada porque si non ponémoste una multa.
La XDLA yá ta avezada a esta presión económica. Dos díes primero de la manifestación, el Conceyu d'Uviéu comunicábanos que pa poder acceder a la Plaza de la Catedral con vehículos pesaos pa instalar l'escenariu, según la Ordenanza Fiscal teníemos que depositar una fianza de 13.500 euros por posibles daños nel firme. Teníemos too diseñao pa que la manifestación se rematare de la manera más vistosa posible y taba en peligru tolo que tuviéremos trabayando nes selmanes previes. Aparte de los gastos que supunxera la manifestación (valles publicitaries, cartelos, equipos de soníu, escenariu, etc.), la cantidá de la fianza yera escomanada pa les posibilidaes financieres de la XDLA. Pero nun podíemos suspendelo too, así que tuvimos qu'encarar la fianza con aportaciones particulares nuestres pa que la manifestación pudiera acabar como queríemos.
Pa una asociación como la XDLA, que basa la so independencia nel trabayu desinteresáu de los sos militantes y nes aportaciones económiques de la xente que ye socio, situaciones como estes suponen un problema evidente, pero tamién nos convencen de que'l nuestru llabor ye más necesariu que nunca. Somos independientes y naide va callanos, pero convién nun escaecer la importancia de la independencia económica pa poder siguir na llucha polos nuestros derechos. Pa quien pueda pensar que la movilización na cai faise sola y ye gratis, ta bien que repare no difícil que ye llevala alantre y tamién no que podemos ayudar caún y caúna de nós pa fortalecer el movimientu. La situación política actual failo más necesario que nunca.