La XDLA pide al Gobiernu d’Asturies qu’aplique les recomendaciones sobre diversidá llingüística aprobaes pola Comisión de Cultura del Europarllamentu
El 18 de xunu pasáu, la Comisión de Cultura del Parllamentu européu aprobó un informe sobre diversidá llingüística realizáu pol diputáu corsu François Alfonsi. Depués d’un procesu d’enmiendes, el documentu aprobóse por unanimidá.
Según l’Atles de les llingües del mundu en peligru de la UNESCO, l’asturianu ye ún de los idiomes europeos que ta nuna situación d’alerta encarnada. La Xunta pola Defensa de la Llingua Asturiana (XDLA) vien pidiendo dende hai años una política llingüística rigorosa, progresiva y evaluable que cumpla coles recomendaciones del Conseyu d’Europa sobre l’aplicación de la Carta Europea de les Llingües Minoritaries, qu’aconseyó yá en tres ocasiones a les autoridades asturianes un ameyoramientu del rangu llegal del nuestru idioma. Agora ye la Unión Europea, al traviés de la Comisión de Cultura, la qu’acaba d’aprobar un informe que recueye delles recomendaciones pa protexer la diversidá llingüística del Continente.
El documentu, que garra como base’l mesmu Tratáu de Lisboa y que recueye que la protección de la diversidá ye ún de los principios fundacionales de la Unión Europea, afirma que tolos idiomes del Continente son iguales en valir y dignidá porque reflexen la riqueza d’Europa. Por eso, l’informe pide a les autoridaes que sían más conscientes de l’amenaza grave que sufren munches llingües y que se comprometan coles polítiques pa preservar la diversidá cultural d’Europa, apoyando polítiques ambicioses de salvaguarda.
Asina, el testu diz qu’identificar nación y llingua única, o l’intentu d’establecer dinámiques de sustitución llingüística pa tratar d’implantar rexímenes monollingües ye un arcaísmu, una llimitación y una vulneración de los valores fundacionales de la Unión. La Comisión de Cultura fala de la importancia de revitalizar les llingües minoritaries al traviés del sistema educativu -cola educación preescolar y primaria como principal activu, amás de la formación pa los padres-; l’establecimientu de procedimientos d’evaluación; programes pa los medios de comunicación -cola posibilidá de crear y desarrollar emisores de radio y televisión-; y l’impulsu nes artes y en toles formes de la vida pública. De la mesma manera, recuerda’l papel importante de los medios de comunicación comunitarios pa salvaguardar y tresmitir estes llingües.
Too esto choca cola política llingüística del Executivu asturianu, que pon toles trabes posibles a que l’asturianu espoxigue nes escueles; obliga a RTPA a tener un porcentaxe d’emisión nel nuestru idioma perbaxo del 5%; y que ta afogando la industria cultural del país con recortes que medren añu tres añu y que tán dexando a munches persones na cai, mentes qu’invisibiliza l’idioma na so actividá pública. Otra manera, la Unión reconoz el papel de los medios de comunicación comunitarios, pero’l Gobiernu asturianu tien secuestrada la llicencia d’emisión de Radio Sele, lo que fai que la única emisora n’asturianu tea en peligru y pueda tener que dexard’emitir.
Por eso, la XDLA pide al Gobiernu d’Asturies que siga les recomendaciones de la Unión Europea pa la recuperación de les llingües en peligru. Estes estructúrense en tres exes: un estatus xurídicu afayadizu centráu nel reconocimientu de los derechos llingüísticos de los falantes; l’encargu de la so salvaguarda polos poderes públicos; y una política llingüística activa pa fomentar el conocimientu y usu de la llingua pola ciudadanía.
