Esti 8 de xunu, la Xunta pola Defensa de la Llingua Asturiana (XDLA) celebró’l Conciertu pola Oficialidá y la edición d’anguaño convirtióse en tou un éxitu al ser una de les más concurríes de los últimos tiempos del festival. Amás, la cita cumplió’l sábadu pasáu’l primer cuartu de sieglu, dalgo que convierte al Conciertu pola Oficialidá nuna de les feches más importantes del calendariu musical y una actividá señalada dientro del panorama cultural asturianu. Al festival reivindicativu y musical acudieron unes 1.500 persones, lo que fixo qu’hubiera que colgar el cartelu de nun hai entraes. Too ello a pesar del tratamientu que-yos dieron los medios de comunicación del país, que namás informaron de la cita a posteriori, a pesar de lo noticiable que yera cumplir 25 años y los intentos de boicó del Centru Internacional Niemeyer y del Conceyu d’Uviéu.

Esti martes 4, a les 20h., estrenamos -xunto a músicos de los cuasi 70 grupos que pasaron per estos 25 años de Conciertu pola Oficialidá- esta esposición que quier valir d'homenaxe al so llabor comprometíu.

Nel actu, amás de presentar la propia esposición, vamos dar anuncia pública (tán convocaos los medios de comunicación) del Conciertu pola Oficialidá d'esti añu.

Por si nun fuera abondo, tenemos el luxu de cuntar cola Asturiana Mining Company, ganadores del Premiu al Meyor Cantar en 2012, que van dar ellí un conciertu tres les presentaciones.

¡tais convidaes!

La selmana anterior a la del Conciertu pola Oficialidá (8 xunu, Xixón) vamos entamar n'Uviéu, na Plaza'l Pescao, una esposición onde vamos axuntar los cartelos y otros materiales de les 25 ediciones.
La cita con esti cuartu de sieglu d'historia va ser el martes 4 de xunu, a les ocho de la tarde, y tán convidaes toles persones músiques de los cuasi 70 grupos que participaron nestos 25 años del Conciertu. Tamién tu tas convidada. ¡Vémonos!

Ente los díes 4 y 10 de mayu ta desenvolviéndose la edición númberu XX de les Chornadas d'as Luengas d'Aragón, entamaes pola Asociación Cultural Nogara-Religada. A lo llargo d'esta selmana van tratase asuntos relacionaos coles llingües minorizaes, amás d'haber feries d'asociaciones, clases d'aragonés y conciertos.