La Xunta pola Defensa de la Llingua Asturiana (XDLA) quier mostrar la so esmolición pola situación del procesu de recuperación toponímica. Va poco, publicóse nel BOPA'l decretu que modifica la toponimia del conceyu de Bual, nome tradicional que dende febreru del añu pasáu yera la única oficial. Sicasí, según el decretu nuevu, esta villa del occidente asturianu pasa a llamase oficialmente Boal/Bual. Asina, y por mor de les presiones y la campaña de manipulación d'un mediu de comunicación, dase un pasu p'atrás na recuperación de los nomes populares depués de que se diera un pasu alantre. Nun se pue escaecer que la Xunta de Toponimia creóse pa recuperar y poner en valir la forma popular cola que los vecinos nomen a los sos llugares. Amás, ye'l Conseyu de Gobiernu'l qu'aprueba los topónimos, pero failo depués d'un trabayu de campu rigorosu y de les aportaciones de los vecinos y del mesmu Conceyu, con un periodu previu de consultes y alegaciones. Too eso inórase y despréciase namás que se crea una polémica mediática: la presión del Gobiernu llega a la Xunta de Toponimia y esta acepta cambiar lo que primero aprobara d'otra manera.
La XDLA quier criticar la dexadez de funciones de la Conseyería de Cultura y de la Dirección Xeneral de Política Llingüística, con competencies nesti terrén al traviés de la Xunta de Toponimia, pero que nesta llexislatura namás recuperó oficialmente la toponimia de tres conceyos -Bual, Valdés y Santu Adrianu-, produciéndose asina un parón nun procesu d'años que, anque hasta'l momentu diba despacio, parecía dir hacia alantre con pasu firme.
Otra manera, nesta llexislatura tamién se produció la modificación de dellos topónimos recoyíos nel decretu de Carreño, que pasaron a aprobase con denominaciones dobles. Ye de reseñar que Carreño llevaba cuasi una década cola so toponimia aprobada y que foron la desinformación y les presiones d'un mediu de comunicación les que fixeron que'l procesu fora hacia atrás.
Por too esto, y concidiendo colos diez años desque s'aprobaren los tres primeros decretos de recuperación de la toponimia tradicional -Carreño, Llanes y El Franco-, la XDLA convoca una acción nueva dientro de la campaña #Oficialidá: con toles lletres. L'actu va celebrase esti sábadu 11 d'abril a les 11 de la mañana nel muelle de Candás.
