DISCURSU DÍA DE LES LLETRES ASTURIANES 2021
posted by xdla
on Xue, 13/05/2021 - 12:01
DISCURSU DÍA DE LES LLETRES ASTURIANES 2021
¡BON DÍA, MUNCHES GRACIES!
Munches gracies a toes y toos por participar nesta primer movilización de les que nos han llevar a l’aprobación de la oficialidá. Gracies por posar pa estes semeyes y por llevar eses banderes que van visibilizar la nuestra reivindicación colectiva los meses que queden hasta vela atendida. Tócanos otru Día de les Lletres Asturianes atípicu, entá condicionáu pol andanciu, asina que pidímosvos que sigáis poniendo procuru na separación de seguranza ente les persones d’alredor mientres dura esti actu y hasta salir de la plaza.
Con distancia, cumpliendo toles normes, que s’oiga la vuestra voz glayando ¡OFICIALIDÁ YÁ!
¡YÁ, YÁ, YÁ, OFICIALIDÁ!
Detrás d’estes banderes de la Xunta pola Defensa de la Llingua Asturiana, detrás d’estos corazones de colores que lleven llatiendo 40 años, hai trés xeneraciones d’asturianes y asturianos.
Una, a la que-y tenemos qu’agradecer que nunca se dieren, que llograren, en condiciones bien peores que les d’agora, facer llegar hasta nós la llingua que compartimos y que por esa llucha, por esi trunfu, merecen una reparación y un reconocimientu.
Hai otra xeneración que namás quier poder vivir n’asturianu con dignidá, ver reconocíos los sos derechos y poder mostrar con arguyu la pertenencia a una comunidá llingüística.
Y la tercer xeneración ye la que necesita tener futuru pa garrar con ilusión el testigu de l’ayalga cultural que suponen les dos llingües propies d’Asturies y asumir con puxu la responsabilidá de conservales pa otres xeneraciones que van venir.
Y too eso, la reparación, la dignidá, el futuru pal asturianu y pal gallego-asturianu, namás va ser posible con oficialidá. La oficialidá va permitir l’usu de la llingua en toles situaciones sociales, va favorecer el desenvolvimientu d’una industria cultural propia d’Asturies, va garantizarla recuperación de la toponimia, va posibilitar la tresmisión xeneracional. Y —non menos importante— va impedir la represión por razones llingüístiques que yá tamos careciendo y de la que yá tamos fartes. En definitiva, cola oficialidá van afitase les condiciones pa la pervivencia de les llingües propies d’Asturies.
Por eso volvemos xuntanos añu tres añu y reclamalo al altu la lleva:
¡L’ASTURIANU, LLINGUA OFICIAL!
Va namás unos díes, sentimos al presidente Barbón na Xunta Xeneral falar de posponer la reforma del estatutu d’autonomía pa “en controlando la situación de pandemia”. Y tenemos que dicir qu’eso, “en controlando la situación de pandemia”, nun ye una fecha, nun ye un plazu aceptable, NUN YE SERIO. Tamién dixo que pa setiembre diba entamar el procesu nos últimos meses d’esti añu… ¿Significa eso qu’esti va ser l’últimu Día de les Lletres ensin oficialidá? Eso esperamos, y vamos tar puxando por ello tol tiempu que quede. Ye urxente abrir el procesu de reforma estaturaria, pero tamién ye urxente zarralu. Nun queremos más comisiones d’estudiu nin más maniobres dilatories qu’aplacen y aplacen y aplacen.
La reforma del estatutu pa declarar la oficialidá yá se tenía qu’entamar en sabiendo qu’había una discriminación, una falta de derechos d’una parte de la población d’Asturies. Nun ye ético saber d’esa inxusticia y nun poner tolos medios que se tienen, tol poder, tola maquinaria llexislativa a furrular p’acabar con ello. Yá tuvo bien d’aplazamientos. Tenemos que volver dicilo:
¡YÁ YE YÁ, OFICIALIDÁ!
¡NIN UN DÍA MÁS CON UN DERECHU MENOS!
Queremos una oficialidá ensin más retrasos, y tamién ensin recortes, y ensin apellíos, como manda la Constitución, como tienen n’otres comunidaes autónomes con una llingua propia diferente del castellanu: Galicia, País Vascu, Navarra, Cataluña, Valencia y Baleares.
Esta selmana repartimos corazones de colores a los grupos parllamentarios de la Xunta Xeneral que tán a favor de la oficialidá. Nun descubrimos nada diciendo que sumen una mayoría abondo p’aprobala. Namás tienen que s’apautar nuna reforma del estatutu,nada escepcional, igual otres qu’hebo a lo llargo d’estos 40 años. Nun-yos pidimos nada heroico, namás que representen a la ciudadanía que los escoyó.Que dexen de llau les estratexes partidaries y qu’encaren col altor qu’amerita la responsabilidá histórica que tienen. Nun hai sides, nun hai nada qu’esperar. Ye posible facelo yá, nesti periodu de sesiones.
¿O ye que tovía nun oyeron lo que-yos pidimos?
¡YÁ, YÁ, YÁ, OFICIALIDÁ!
Vamos garrar eses banderes que tenéis nes manesy llevales per toa Asturies como una insignia de dignidá hasta que nun véamos reconocíos los nuestros derechos.
¡Yá tuvo bien de ser cuidadanía de segunda!
¡Non a la discriminación llingüística!
¡Basta yá d’humildar a la xente asturfalante!
¡L’ASTURIANU, LLINGUA OFICIAL!
Documentos:
