La oficialidá del asturianu va suponer una industria que xenerará perriba del 2 % del PIB y más de 10.000 empleos
La Xunta pola Defensa de la Llingua Asturiana (XDLA) afirma que la oficialidá d'asturianu y gallego-asturianu y el so impactu na economía de la comunidá autónoma podía suponer la creación de más de 10.000 puestos de trabayu nuevos, xenerando asina alredor del 2 % del PIB. Son les estimaciones de la organización atendiendo a informes d'otres comunidaes billingües sobre lo que supunxo'l desarrollu d'esti marcu llegal pa la so llingua propia y la so economía.
Nestos informes analízase cómo estos idiomes xeneren un impactu positivu na economía al ponese en marcha midíes concretes de normalización llingüística, como les relatives al enseñu de la llingua, servicios de traducción, asesoría llingüística, medios de comunicación, llibreríes, editoriaes, discográfiques, producción audiovisual o servicios de les propies alministraciones públiques.
Esta mesma selmana diose a conocer l'últimu informe d'estes característiques hasta la fecha: ún sobre'l valencianu ellaboráu pol Institutu Valencianu d'Investigaciones Económiques. Esti cifra l'impactu económicu del idioma propiu nunos 2.000 millones d'euros, xenerando un 3 % del empléu nesta comunidá -56.000 empleos- y el 2,1 % del PIB.
Nel casu del País Vascu, nel 2015 un estudiu del Gobiernu autonómicu cifró en 2.800 millones d'euros el valir de la llingua d'esa tierra, lo que supón el 4,2 % del PIB vascu y 56.142 puestos de trabayu -el 6,28 % del total-. Otra manera, según datos del Consello da Cultura Galega, la industria de la cultura d'esta comunidá xenera 30.000 empleos y 1.103 millones d'euros -el 2 % del PIB gallegu-.
Como se pue ver nel casu d'estes comunidaes, la oficialidá de les llingües propies, amás de reconocimientu de derechos y valoración d'un patrimoniu cultural incalculable, supón un beneficiu económicu pa la comunidá autónoma, afalando asina la puesta en marcha d'una economía moderna rellacionada cola creatividá.
Ta demostrao -nun fai falta poner exemplos- que la falta d'oficialidá nun supunxo p'Asturies ser una autonomía económicamente puntera a nivel estatal, polo que poner en marcha esti marcu llegal y apostar pola industria cultural pareznos la meyor manera d'encarar el procesu de cambiu que vive la economía asturiana, inxertada en metá del procesu de transición enerxética y que necesita desarrollar capacidaes clave pa la economía moderna y, al empar, ser capaz a proyectar hacia l'esterior la 'marca Asturies'.