La XDLA acusa al PP de ser el partíu qu'históricamente siempre ta contra los derechos individuales de les persones
posted by xdla
on Mié, 19/07/2017 - 16:45
Como vien siendo un vezu nos últimos meses, el PP asturianu vuelve a mostrar el so autoodiu y la so falta de compromisu cola igualdá de los asturianos y asturianes énte los demás ciudadanos del Estáu español. Asina, el partíu lideráu por Mercedes Fernández acaba de recurrir énte'l Tribunal Superior de Xusticia d'Asturies (TSXA) el plan pilotu d'usu del asturianu como llingua vehicular. Y ye que los populares ven l'ataque a ún de los nuestros símbolos d'identidá como una manera d'esviar mediáticamente l'atención de los casos de corrupción que chisquen les sos sigles.
La Xunta pola Defensa de la Llingua Asturiana (XDLA) yá calificó'l plan pilotu impulsáu pol Gobiernu autonómicu como bien llimitáu y restrinxíu. Hai que recordar que se va llevar alantre de forma voluntaria en seis centros, namás una hora a la selmana y que va tener que cuntar col preste del equipu directivu del centru y de los pas y mas del alumnáu. Sicasí, el PP nun quier equí n'Asturies esa llibre elección que tanto defende n'otros territorios y qu'usa nes demás comunidaes autónomes con llingua propia p'atacar la diversidá llingüística del Estáu.
Ye un sinsentíu más del PP, un partíu que siempre fixo bandera de lluchar contra los avances n'igualdá y derechos individuales de les persones. Y ye que de la mesma manera qu'agora va llevar a los tribunales que los pas y mas puedan escoyer llibremente que los sos fíos reciban conocimientos n'asturianu, yá votó en contra d'avances históricos como la llei del divorciu o'l matrimoniu igualitariu. Ye una muestra más d'intolerancia, de falta de respetu y de gana d'imponer les sos idees retrógrades a quien nun piensa como ellos.
Sicasí, de xuru que dalgún día van cayer de la burra. Si hai diez años el PP llevaba a los tribunales la llei de matrimoniu igualitariu, hai pocos díes vimos a dirixentes importantes del partíu, como Cristina Cifuentes, nos actos del Arguyu Gai de Madrid. Dende la XDLA invitamos al PP asturianu a que se sume a esi cambiu, a dexar de llau idees propies d'otros tiempos y apoye la igualdá, que nel casu d'Asturies implica respetar l'usu de la llingua asturiana nel sistema educativu. Quién sabe, igual dalgún día Cherines fai igual que la so homóloga madrilana y vémosla blincando nel Conciertu pola Oficialidá.